Taıvanda poıyz relsten shyǵyp ketip, 22 adam qaza tapty
ASTANA. QazAqparat - Taıvannyń soltústik shyǵysynda jolaýshylar poıyzy apatqa ushyrap, 22 adam qaza tapty, 170-ten astamy jaralandy. Taǵy birnesheýi úıindi astynda qalýy múmkin, dep habarlaıdy Bı-bı-sı jergilikti bılikke silteme jasap.
Apat jergilikti ýaqytpen keshki saǵat bes shamasynda, Taıpeıden 70 shaqyrym jerde bolǵan.
6432 temirjol ekspresiniń barlyq jeti vagony relsten shyǵyp ketken. Taıpeı-Taıtýng baǵdaryndaǵy poıyzda 366 adam bolǵan.
Taıvan temir joly basshysynyń orynbasary Lý Chı-shen baspasóz máslıhatynda: «poıyzdyń qoldanysqa berilgenine alty jyl, tehnıkalyq jaǵdaıy jaqsy, - dep málimdedi.
Ázirge poıyzdyń relsten shyǵyp ketýine ne sebep bolǵany belgisiz.
Dárigerler men órt sóndirýshiler jaralylarǵa kómektesýde. Eldiń qorǵanys mınıstriniń aıtýynsha, qutqarý operatsııasyna 120 áskerı qyzmetshi tartylǵan.
Aıta ketsek, bul eldegi temirjol arqyly kún saıyn jarty mıllıonǵa jýyq jolaýshy tasymaldanady.
