Taıvanda «Haıkýı» taıfýnynan 44 adam zardap shegip, myńdaǵan úı jaryqsyz qaldy
TAIBEI. QazAqparat – Taıvanǵa soqqan Haıkýı taıfýny saldarynan kem degende 44 adam zardap shegip, on myńdaǵan úı elektr jaryǵynsyz qaldy, dep habarlaıdy QazAqparat CNN-ge silteme jasap.
Taıvannyń Ortalyq meteorologııalyq bıýrosynyń habarlaýynsha, taıfýn jaǵalaýdaǵy Dýnhe qalasyna jergilikti ýaqyt boıynsha 15:40 shamasynda soqty. 11 qala men okrýgte kem degende 7 113 adam evakýatsııalanyp, 48 506 úı jaryqsyz qaldy.
Meteorologııalyq bıýronyń málimetinshe, epıtsentrdegi jeldiń jyldamdyǵy saǵatyna 155 shaqyrymǵa (saǵatyna 96 mıl) jetken.Haıkýı – Taıvanǵa sońǵy tórt jylda soqqan alǵashqy taıfýn.
Meteorologııalyq bıýro taıfýn saldarynan jaýǵan nóser jańbyr sý tasqyny men kóshkinderdi týdyrýy múmkin ekenin habarlady. Taýly Hýalıan ýezinde jaýyn-shashynnyń jalpy mólsheri 500 mıllımetrden asty.
Buǵan deıin taıfýn jeksenbi kúni keshki saǵat 17:00 shamasynda Taıdýn qalasynyń mańyndaǵy jaǵalaýǵa soǵady, degen boljam jasaldy.
Jergilikti bıliktiń habarlaýynsha, jeksenbi kúni Taıvannyń ońtústigi men shyǵysyndaǵy jeti okrýg pen qalada mektepter men kásiporyndar jumysyn toqtatty.
Jeksenbi kúni Taıvannan shyǵatyn jáne Taıvanǵa kiretin 246 reıs toqtatyldy nemese keshiktirildi.
Gonkongta da nóser jaýyn men kóshkinge ulasqan Saola taıfýny saldarynan kem degende 86 adamnyń zardap shekkeni habarlandy. Onda da júzdegen reıster jumysyn toqtatýǵa májbúr boldy.
Buǵan deıin Haıkýı taıfýny Haıvanǵa jaqyndap, myńdaǵan turǵyn qaýipsiz aımaqqa kóshirilgenin habarlaǵan bolatynbyz.
