Taıvan 120 myń ıgýanany óltirýdi josparlap otyr

ASTANA. KAZINFORM – Igýanalar araldyń aýyl sharýashylyǵy salasyna aıtarlyqtaı zııan keltirip jatyr, dep habarlaıdy Associated Press. 

Orman sharýashylyǵy jáne tabıǵatty qorǵaý agenttiginiń qyzmetkeri Chıý Go-haonyń aıtýynsha, egin sharýashylyǵymen aınalysatyn araldyń ońtústik jáne ortalyq aımaqtarynda 200 myńǵa jýyq baýyrymen jorǵalaýshy mekendeıdi.

Arnaıy jaldanǵan toptar ótken jyly shamamen 70 myń ıgýanany óltirip, árqaısysy úshin 15 dollarǵa deıin syıaqy aldy. 

- Kóptegen adam olardy súıkimdi kishkentaı úı janýarlary retinde satyp alady. Biraq ıgýananyń qanshalyqty úlken bolatynyn bilmeıdi. Keıin olardy jabaıy tabıǵatqa qaıta jiberedi. Baýyrymen jorǵalaýshylar Taıvandaǵy dalaly jerlerge jaqsy beıimdelip ketedi. Bul olardyń tez kóbeıýine jol ashady. Endi biz olardy joıýǵa jáne tabıǵı tepe-teńdikti qalpyna keltirýge májbúr bolyp otyrmyz, - dep atap ótti Ońtústik Pıntýn okrýgi aýylsharýashylyq departamentinen Lı Chı-ıa. 

Taıvanda jasyl ıgýanalardyń tabıǵı jyrtqysh túrleri joq. Erkek daralarynyń uzyndyǵy 2 metrge deıin, salmaǵy 5 kelige deıin jetedi jáne 20 jylǵa deıin tirshilik etedi. Al urǵashylary bir ýaqytta 80-ge deıin jumyrtqa sala alady. 

Jasyl ıgýana agressııa kórsetpeıdi. Olardyń azyǵy negizinen jemister, japyraqtar jáne ósimdikterden turady. Keıde usaq janýarlarmen qorektenedi.