Taısoıǵandaǵy munaıdy ıgerý úshin Qazaqstan Reseıge basqa jerler usynýdy qarastyrady - S. Myńbaev
ANA. 7 sáýir. QazAqparat /Qanat Mámetqazyuly/ - Taısoıǵandaǵy munaıdy ıgerý úshin Qazaqstan Reseıge basqa jerler usynýdy qarastyrady.
Bul týraly búgin QR Parlamenti Senatynyń jalpy otyrysynda «Belarýs Respýblıkasynyń, Qazaqstan Respýblıkasy men Reseı Federatsııasynyń munaı men munaı ónimderiniń ortaq naryqtaryn uıymdastyrý, basqarý, olardyń jumys isteý jáne damý tártibi týraly kelisimdi ratıfıkatsııalaý týraly» QR Zańyn talqylaý barysynda Munaı jáne gaz mınıstri Saýat Myńbaev málim etti.
Qujatty talqylaý barysynda senator Sársenbaı Eńsegenov: «Atyraý oblysynyń aýmaǵyndaǵy Qyzylqoǵa aýdanynda 929-shy ushý synaq polıgony retinde Reseıge berilgen jer bar. Osy jer Qyzylqoǵa aýdanynyń úshten bir bóligin alyp jatyr. Sol jerde munaı kózderi bar degen aqparat shyǵyp edi. Endeshe, osy Qyzylqoǵa aýdanyndaǵy munaı kózderin ózimizge alyp, paıdalaný múmkindikteri bar ma?», - dep suraǵan bolatyn mınıstr Saýat Myńbaevtan. Óz kezeginde depýtat saýalyna jaýap bere kele mınıstr: «Aıtyp otyrǵanyńyz «Taısoıǵan polıgony» shyǵar. Rasynda, Taısoıǵan polıgonyndaǵy biraz ken oryndarynda munaı tabylǵan. Qazir Úkimet Reseı tarapyna osy suraqty kóterip otyr. Biz munaı tabylǵan jerdi Taısoıǵan polıgonynyń aýmaǵynan shyǵaryp, Reseıge basqa jerlerden polıgon aýmaǵyn qarastyryp beremiz degen oıdamyz. Bul suraqty Qorǵanys mınıstrligimen birlese kóterýdemiz. Qalaı sheshimin tabatyny aldaǵy ýaqytta belgili bolady», - dep jaýap qaıtardy.
