Taısondy jeńgen boksshyny sabaǵan qazaq: Almatydaǵy kásipqoılar aıqasy qalaı ótti

ALMATY. QazAqparat - Almatynyń Balýan Sholaq atyndaǵy sport kesheninde ótken kásipqoı boks keshinde qazaqtyń 9 boksshysy óner kórsetti. Qanat Islamnyń jarqyn jeńisine deıin rıngke shyqqan toǵyz sportshymyz da jeńis tuǵyrynan kórinip, birneshe tıtýlǵa ıe boldy, dep habarlaıdy QazAqparat tilshisi.

Qatarynan onynshy jeńisin toılaǵan Abylaıhan Qusaıynov NBA tıtýlyna ıe boldy. Qarsylasy G.Arýtıýnıan úshinshi raýndtyń basynda-aq syr bere bastaǵan. Úsh raýnd boıy burysh saǵalaǵan armıan boksshysynyń bapkerleri aqyry sharshy alańǵa oramal tastaýǵa májbúr boldy.

«Meni qoldaǵan barshańyzǵa rahmet. Bul jekpe-jekke jaqsylap daıyndaldym. Bapkerim men baýyrlaryma alǵysym sheksiz. Óz elimizde ótip jatqandyqtan, aıqas aldynda qobaljý da boldy. Áli de osy qarqynymnan taımaýǵa daıynmyn», - dedi ol jekpe-jekten keıin.

Osy keshte aýyr salmaqtaǵy Rýslan Myrsataev Dennı Ýılıamsty nokaýtqa jiberdi. Osydan 15 jyl buryn áıgili Maık Taısondy shaý tartqan shaǵynda qulatyp, aty shyqqan brıtandyq boksshy Rýslannyń joıqyn soqqylaryna tótep bere almady. 45 jastaǵy brıtandyq 53-ret kásipqoı rıngke shyǵyp, 27-jeńilisiniń dámin tatty.

Taǵy bir qazaq boksshy Madııar Áshkeev ýkraınalyq Igor Fanıannan tóreshilerdiń sheshimi boıynsha basym tústi.10 raýndqa josparlanǵan aıqas jetinshi raýndta toqtatyldy. Qazaqstandyq sportshynyń qabaǵy jarylyp, dárigerler onyń sharshy alańǵa shyǵýyna ruqsat bermedi. Halyqaralyq boks erejesine sáıkes, kezdesý toqtaǵanǵa deıin Madııardyń jınaǵan upaıy kóp bolǵandyqtan, jeńis biraýyzdan qazaq boksshysyna berildi. Osylaısha ol NABF Junior jáne NABA tıtýldaryn qanjyǵasyna baılady.

Al asa aýyr salmaqtaǵy Nursultan Amanjolov belarýstyq Pavel Krolenkony utsa, ekinshi orta salmaqta Arman Rysbek ýkraınalyq Denıs Chechetany sabasyna túsirdi. Orta salmaqta Saparbaı Aıdarov taǵy bir ýkraınalyq Vladıslav Tantsıýrany jeńse, birinshi orta salmaqta Berikbaı Nurymbetov reseılik Karen Avetısıannan basym tústi. Jartylaı orta salmaqtaǵy Asqar Erýbek belarýs Andreı Stolıarchýkty moıyndatsa, jartylaı jeńil salmaqtaǵy ózbek boksshy Beksultan Raýshanov ázerbaıjandyq Asqar Ragımovty jeńdi.

Keshtiń basty kezdesýinde «Qazaq» laqap atymen tanymal Qanat Islam domınıkalyq qarsylasyn 14-sekýndta uryp jyqty.

Bul aıqasqa daıyndyq barysynda Qanat Islam aıaqtaǵy jaraqatynan tolyq aıyqqanyn aıtqan edi.

Eske salsaq, QR Prezıdenti Qasym-Jomart Toqaev Qanat Islamnyń aldaǵy jekpe-jekterine sáttilik tilegen bolatyn.

Boks keshinen tikeleı translıatsııany «Qazaqstan» jáne «Qazsport» telearnalary júrgizdi.