Taıson Meıvezermen jekpe-jeginiń qaıda jáne qashan ótetinin jarııalady
ASTANA. KAZINFORM – Aýyr salmaqtaǵy burynǵy álem chempıony Maık Taıson Floıd Meıvezermen bolatyn jekpe-jegi kelesi jyldyń naýryz aıynda Afrıkada ótetinin rastady, dep habarlaıdy Kazinform.
Tanymal boksshylar arasyndaǵy jekpe-jek týraly qyrkúıek aıynda jarııalanǵan bolatyn. Biraq kezdesýdiń ótý-ótpeýi ásirese Meıvezer 2026 jyly Mennı Pakıaomen revansh ótkizýdi qarastyryp jatqany týraly habarlamalarǵa baılanysty birneshe aı boıy belgisiz boldy. Degenmen, Dýblınde bergen suhbatynda Taıson jekpe-jekke arnalǵan sońǵy josparlary týraly baıandady.
- Ol naýryz aıynda Afrıkada ótedi. Bul keremet jekpe-jek bolady, ol barlyq rekordtardy jańartady jáne sport tarıhyndaǵy eń iri oqıǵalardyń birine aınalady, - dep málimdedi ol.
Taıson jekpe-jektiń ótpeı qalýy múmkin degen qaýesetterge qaramastan kórmelik jekpe-jekke daıyndyq jalǵasyp jatqanyn, biraq naqty kúni men orny áli jarııalanbaǵanyn atap ótti.
Boksshylardyń salmaq aıyrmashylyǵy 30 keliden (70 fýnt) asatyndyqtan, jekpe-jek resmı bolmaıdy. Taıson 2024 jyly Djeık Polmen ótken jekpe-jeginde shamamen 104 keli (228,5 fýnt) salmaqta boldy, al Meıvezer kásibı rıngke sońǵy ret 2017 jyly shamamen 68 keli (149,5 fýnt) salmaqta shyqqan. Sportshylardyń ekeýi de burynǵy qalyptarynan alys. Jekpe-jek kezinde Taıson shamamen 60 jasta bolady, al odan 11 jas kishi Meıvezer sońǵy jyldary blogerler men shoý-bıznes tulǵalarymen kóbine kórmelik jekpe-jekter ótkizip keledi.
Sarapshylardyń pikirinshe, qarjylyq kelisimder jekpe-jekti uıymdastyrýda mańyzdy ról atqardy. Qolda bar málimetke sáıkes, 48 jastaǵy Meıvezer kelisimshartqa qol qoıǵannan keıin aıtarlyqtaı tólem alyp úlgergen.
Buǵan deıin álemge tanymal boksshy kishi Roı Djons Kazinform agenttigine bergen eksklıýzıv suhbatynda Ortalyq Azııa óńirinde kásibı boks ınfraqurylymyn damytý jónindegi oılaryn, jas talanttarǵa tanylý men jetistikke jetýge kómektesý josparlary týraly áńgimeledi.