Taıpeıde ótip jatqan Azııa chempıonatyn Qzaqstannyń áıelder quramasy sátti bastady
ALMATY. 15 qyrkúıek. QazAqparat /Erlik Erjanuly/ - Búgin Qytaıdyń Taıpeı qalasynda voleıboldan áıelder arasynda XVI Azııa chempıonaty bastaldy. Qurlyqtyń úzdik 14 komandasy qatysyp jatqan bul baıraqty básekede qazaqstandyqtar Úndistan quramasyn 3:1 (22-25, 27-25, 25-18, 25-10) esebimen utty.
Baqytjan Baıtóreevtiń tálimgerleri alǵashqy kezeńde Qytaı, Soltústik Koreıa jáne Úndistan quramalarymen birge «S» tobynda óner kórsetýde. Olar erteń koreı, al arǵy kúni qytaı sportshylarymen synǵa túsedi. Óz tobynda 1-2 oryn alǵandar jarystyń kelesi kezeńinde 1-8, al ózgeleri 9-14 oryndar úshin talasatyn bolady. Jalpy Azııa chempıonaty bıyl Japonııada ótetin Álem kýbogynyń jáne 2012 jylǵy Olıpıada oıyndary men Álemdik Gran-Prıdiń irikteý týrnıri sanalady. Onda bul joly el namysyn Sana Jarlaǵasova (1989), Zarına Seıitqazınova (1993), Antonına Pımenova (1984), Olga Nasedkına (1982), Krıstına Trýbına (1986), Korınna Ishımtseva (1984), Irına Lýkomskaıa (1991), Marına Storojenko (1985), Ekaterına Akılova (1992), Ekaterına Shenberger (1992), Olga Drobyshevskaıa (1995) men Elena Ezaý (1993) qorǵaýda. Jarys qorytyndysy 23 qyrkúıekte bolatyn aqtyq oıyndarda belgili bolmaq.
