Taıms-Skverdegi úlken ekranda AHQO týraly aqparat jarııalandy

ASTANA. QazAqparat - «Astana» halyqaralyq qarjy ortalyǵy men iri amerıkalyq bırja NASDAQ arasyndaǵy yntymaqtastyq týraly aqparat Nıý-Iorktegi ataqty Taıms-Skverde, eń úlken LED-ekrandardyń birinde paıda boldy, dep habarlaıdy AHQO baspasóz qyzmeti.

Buǵan deıin habarlaǵanymyzdaı, «Astana» Halyqaralyq Qarjy ortalyǵy (AHQO) men Nasdaq Inc. tehnologııalyq kelisimge qol jetkizdi.

Qol qoıylǵan kelisimderge saı, (AHQO) men Nasdaq Inc 2017 jyldyń aıaǵynda iske qosylatyn jańa qazaqstandyq bırja - AHQO Qor bırjasyn birlesip damytatyn bolady.

Aldymen AHQO Qor bırjasynda belgilengen mólsherdegi tabysqa ıe aktsııalarmen saýda, onan keıingi kezeńde aktıvterdiń ózge klastarymen saýda jasalynady dep kútilýde.

Jańa bırja boıynsha kelisim aıasynda berilgen aqparattardy suryptaıtyn Nasdaq Matching Engine júıesi paıdalanylady. Resmı túrde iske kiriskenge deıin bul tehnologııa testileý men tekserýden ótedi.

Nasdaq Matching Engine - bul aqparattardy suryptaıtyn eń jıi kezdesetin júıe, bıznes úshin tıimdiligi jáne óndiristik qýaty joǵary.

Nasdaq AHQO Bırjasynyń iske kiriskennen keıingi kezeńinde de tehnologııalyq kómek kórsetetin bolady.

«Nasdaq Matching Engine qaýpisizdik jáne atqaratyn qyzmet turǵysynan álemdegi eń myqty saýda alańy bolyp eseptelinedi. AHQO eldegi bırja ınfraqurylymyn Nasdaq-pen birge qurýy AHQO úshin mańyzdy», - dedi AHQO basqarýshysy Qaırat Kelimbeto.

Nasdaq-tiń atqarýshy vıtse-prezıdenti, naryqtyq tehnologııa boıynsha basshysy Lars Ottersgardtiń aıtýynsha, Nasdaq úshin Qazaqstan jáne onymen baılanysty halyqaralyq naryqtar úshin AHQO-nyń bırjalyq ınfraqurylym qurýynda óz áserin tıgizý úlken mártebe.

«Nasdaq-tiń qarjylyq alańqaıyn paıdalaný arqyly AHQO bırjasy asa shuǵyl damyp jatqan halyqaralyq naryqtaǵy óz básekege qabilettiligin arttyrýda operatsııalaryn standarttap, birizdi jasaýǵa áser etetin ınnovatsııalyq tehnologııalarboıynsha jumys isteıdi. Biz AHQO-men yntymaqtasa jumys isteýge jáne osy jańa baǵytta kómek berýge ázirmiz», - deıdi ol.

Saýda, klırıng, qundy qaǵazdardyń ortalyq depozıtarıi (CSD) men naryqqa monıtorıng jasaıtyn jáne ózge de júıelerdi qamtıtyn Nasdaq bırjalyq tehnologııalary Amerıka, Eýropa, Azııa, Avstralııa, Afrıka, Taıaý Shyǵys pen Karıb basseıni elderindegi 90 naryqta qoldanylady.