Almatyda jedel járdem kóligi jasóspirimdi qaǵyp ketti

ALMATY. KAZINFORM – Almatyda Jandosov pen Beregovoı kósheleriniń qıylysynda jedel járdem kóligi jaıaý júrginshini qaǵyp ketti.

Jelide taraǵan vıdeoda sol jedel járdem brıgadasynyń feldsherleri jolda jatqan jasóspirimge alǵashqy medıtsınalyq kómek kórsetip jatqanyn baıqaýǵa bolady.

Almaty polıtsııa departamenti oqıǵanyń mán-jaıyn túsindirdi. Jergilikti polıtsııa qyzmetiniń kezekshi bóliminiń habarlaýynsha, jol-kólik oqıǵasy 7 qazan kúni saǵat 17:20 shamasynda Áýezov aýdanynda bolǵan.

– Jedel járdem kóliginiń júrgizýshisi Jandosov kóshesimen shyǵys baǵytta, qarsy qozǵalys jolaǵymen kele jatyp, Beregovoı kóshesiniń qıylysynda jaıaý júrginshiler ótkelimen joldy kesip ótip bara jatqan adamdy qaǵyp ketken. Jol apaty saldarynan 2009 jyly týǵan jasóspirim balalar aýrýhanasyna jetkizildi, - dep habarlady qalalyq polıtsııa departamentiniń baspasóz qyzmeti.

– Naýqas dereý №2 qalalyq balalar klınıkalyq aýrýhanasynyń qabyldaý bólimine jetkizildi. Neırohırýrgtiń tekserýinen jáne qajetti zertteýlerden keıin «jabyq bas-mı jaraqaty, mıdyń shaıqalýy, bastyń, bettiń jáne sol jaq tize býynynyń jumsaq tinderiniń kógerýi» degen dıagnoz qoıyldy, - dep habarlady Almaty qoǵamdyq densaýlyq saqtaý basqarmasynyń baspasóz qyzmeti.

Dárigerlerdiń aıtýynsha, balanyń jaǵdaıy ortasha aýyr.

Naýqas ári qaraı baqylaý jáne qajetti em alý úshin neırohırýrgııa bólimshesine jatqyzyldy.

Qazir oqıǵanyń mán-jaıyn Áýezov aýdandyq polıtsııa basqarmasy anyqtap jatyr.

Eske salaıyq, buǵan deıin Almaty oblysy Talǵar aýdanynda shaqyrýǵa bara jatqan jedel járdem kóligi Lexus RX 300 avtokóligimen soqtyǵysyp, aýdarylyp qalǵan edi.