Taılandta jaǵajaı voleıbolynan Azııa chempıonaty ótip jatyr

27 qarasha kúni jalaýyn kótergen baıraqty básekede el namysyn Baqtygúl Samalyqova men Lıýbov Bogatý qorǵaýda. 12 eldiń 19 jup sportshysy qatysyp jatqan dúbirli dodanyń toptyq  kezeńinde qazaqstandyq qyzdar Qyrǵyzstan, Gonkong jáne  Taılandtyq qurdastarymen bir topta saıysqa túsýde. Olar bul synda qyrǵyzstandyqtardy 2:0, odan keıin taılandyqtardy 2:1 esebimen jeńip, búgin endi gonkongtyqtarmen kezdesýde.  Alǵashqy 2 oıyndaǵy jeńisi olarǵa bul kezdesýdiń nátıjesine qaramastan birden pleı-off kezeńine shyǵýǵa múmkindik beredi.

Qazaqstandyq jup bıyl Kanadada 21 jasqa deıingi sportshylar arasyndaǵy Álem chempıonatynda óner kórsetip, Azııalyq qurlyqtyq kýbokta ulttyq qurama sapynda qola júldeger atanǵan bolatyn. Sondyqtan 30 qarasha kúni  aıaqtalatyn stýdenttik komandalar arasyndaǵy Azııa chempıonatynda júldeli orynnan basty úmitkerlerdiń biri bolyp otyr.