Taılandta ustalǵan bortynda qarý-jaraq tıelgen ushaq Grýzııa áýe kompanııasyna tıesili bolyp shyqty
ASTANA. Jeltoqsannyń 14-i. QazAqparat /Jasulan Amanbaıuly/ - Taılandta ustalǵan bortynda qarý-jaraq tıelgen ushaq Grýzııa áýe kompanııasyna tıesili bolyp shyqty. Bul týraly búgin jýrnalısterge Azamattyq avıatsııa komıtetiniń tóraǵasy Rádilbek Ádımolda málim etti,
dep habarlaıdy QazAqparat.
R. Ádımoldanyń atap kórsetkenindeı, Bankokta ustalǵan ushaqta L-4 jazýy bolǵan. Bul onyń Grýzııa áýejelileriniń qaramaǵyna jatatyndyǵyn kórsetedi. Belgili bolǵan aqparatqa sáıkes, ushaq Grýzııanyń «Eır vest Djordjııa» kompanııasynyń menshigi. Bıyl qazan aıynyń 7-si kúni Qazaqstannyń «Beıbarys» áýe kompanııasynan satyp alynǵan. Qarý-jaraq ushaqqa munaı-gaz óndirýge kerekti qural-jabdyqtar retinde kórsetilip tıelgen.
Ushaqtyń basqarýynda bolǵan 5 ekıpajdyń 4-ýi «Istvıng» áýe kompanııasynda qyzmet isteıtin Qazaqstan azamattary. Bireýi Belarýs eliniń azamaty ekendigi belgili boldy. Qazaqstandyqtardy «Istvıng» tólemaqysyz eńbek demalysyna shyǵarǵan jáne olardyń Grýzııanyń áýe kompanııasynda jumys atqarýynyń qalaı bolǵany belgisiz. Degenmen, onyń aıtýynsha, halyqaralyq tájirıbede ushqyshtardyń birneshe kompanııalardyń qaramaǵynda qyzmet isteýi bar jáne ol oryndy.
«Qazaqstandyq ushqyshtar ushaqtyń ishindegi júktiń qarý-jaraq ekendigin bilmegen de bolar dep sanaımyn. Sebebi, olar júkke emes, qujatqa qarap tekseredi. Olardyń Taıland memleketinen shyǵarylýyna biz barlyq múmkindikter men qoldan kelgenimizdi isteımiz», dep atap kórsetti R. Ádımolda.
