«Taılandta tutqyndalǵan ushaq shymkenttiki me?»- respýblıkalyq basylymdarǵa sholý

***

«Keshe Memleket basshysy Nursultan Nazarbaev Densaýlyq saqtaý mınıstri Jaqsylyq Dosqalıevti qabyldady» dep jazady «Egemen Qazaqstan» gazeti QR Prezıdenti baspasóz qyzmetine silteme jasap. Basylymnyń jazýynsha, J.Dosqalıev Elbasyna mınıstrliktiń 2009 jylǵy jumys qorytyndylary týraly habardar etken.

Elbasynyń Densaýlyq saqtaý mınıstrin qabyldaǵany jaıyndaǵy aqparat «Kazahstanskaıa pravda» gazetinde de jaryq kórdi. «Memleket basshysy jańa mindetter qoıdy. Medıtsınada jáne alǵashqy medıtsınalyq-sanıtarlyq kómek kórsetý júıesinde profılaktıkalyq baǵyttardy kúsheıtý, halyqty sapaly dári-dármektermen jáne azyq-túlik ónimderimen qamtamasyz etý jónindegi mindetti sheshý qajet. Osy tapsyrmanyń bári ázirlenip jatqan Qazaqstannyń densaýlyq saqtaý júıesin damytýdyń 2011-2015 jyldarǵa arnalǵan memlekettik baǵdarlamasynyń negizin quraıdy», dedi jýrnalısterge arnalǵan brıfıngte Jaqsylyq Dosqalıev.

Qańtardyń 26-synda Premer-Mınıstr Kárim Másimovtiń tóraǵalyǵymen Úkimettiń kezekti otyrysy bolyp ótti. Onda Qazaqstan Respýblıkasy Úkimetiniń, Ulttyq banktiń jáne Qarjy uıymdary men qarjy rynogyn retteý jáne qadaǵalaý jónindegi agenttiktiń (QQA) 2010 jylǵa arnalǵan ekonomıkalyq saıasatynyń negizgi baǵyttary jónindegi úndeýi talqylanyp, qabyldandy. Osyǵan oraı «Egemen Qazaqstan» gazetinde «2010 jylǵy ekonomıkalyq saıasattyń negizgi baǵyttary» degen taqyryppen maqala jaryq kórdi. Basylymnyń jazýynsha, 2009 jylǵy ishki jalpy ónimniń naqty ósimi 1,1 paıyzdy qurady. Ótken jylǵy ınflıatsııa boljanǵan 8-8,5 paıyzdyń ornyna 6,2 paıyz boldy. Kapıtal deńgeıiniń tıimdi dárejesin qalyptastyrý jáne bankterge qosymsha ótimdilik berý bank salasynda turaqtylyqty qamtamasyz etti. Jalpy alǵanda osy retteý sharalary bankterdiń syrtqy qaryzyn 33,6 paıyz azaıtýǵa jaǵdaı jasady. 2010 jyly «Samuryq-Qazyna» AQ tara­pynan jasalynyp jatqan sha­ralarǵa baılanysty qaıta quryl­ǵan eki banktiń syrtqy qaryzy taǵy da 10 mıllıard AQSh dolla­ry­na azaıtylmaq.

«Keshe EQYU-nyń Іs basyndaǵy tóraǵasy, Memlekettik hatshy - Syrtqy ister mınıstri Qanat Saýdabaevtyń Brıýsseldegi jumysy tańerteńnen qaýyrt bastaldy. Sonyń ishinde eń basty otyrysy EQYU men Eýroodaq arasyndaǵy mınıstrler deńgeıindegi saıası únqatysý boldy», dep jazady «Egemen Qazaqstan» gazeti. Taraptar arasyndaǵy saıası únqatysý dep atalatyn bul kezdesýde qatysýshylar «Korfý protsesi» sekildi keńesý sharasynyń mańyzdylyǵyn atap ótip, osy máselege baılanysty bıylǵy jyly sarapshylardyń segiz otyrysy bolatynyna qanaǵat bildirdi. Kezdesýde kóterilgen ekinshi kúrdeli másele Aýǵanstan problemasy boldy. Atalǵan jaıttardy basylymnyń búgingi sanynan «Saıası únqatysý salıqalylyqqa shaqyrady» degen taqyryppen berilgen maqaladan oqı alasyzdar.

«Uıym tóraǵasynyń bastamalaryn qoldaıdy». «Grýzııa EQYU tóraǵasynyń bastamalaryn qoldaıdy jáne onyń júzege asýyna tileýles. Osy pikirdi keshe elimiz Parlamenti Májilisiniń Tóraǵasy Oral Muhamedjanovpen ótken kezdesýinde Grýzııanyń Qazaqstandaǵy Tótenshe jáne ókiletti elshisi Paata Kalandadze málim etti. Taraptar áńgime barysynda Qazaqstan basshysy jarııa etken elimizdiń EQYU-daǵy tóraǵaly­ǵy­nyń urany tórt "T" - "trast" (senim), "tradıshn" (dás­túr), "trans­parensı" (ashyqtyq) jáne "tolerans" (tózimdilik) tý­raly sóz qozǵady. Qazaqstannyń ustanymy EQYU elderi ara­synda ǵana emes, barlyq Eýr­azııa qurlyǵy boıyn­sha qarym-qatynasty nyǵaıtýǵa, qaýipsiz­dik­ti saqtaýǵa óz úlesin qosa­tyny aıtyldy», dep jazady «Egemen Qazaqstan» gazeti.

***

«Elimizdiń eń kóne shaharlarynyń biri - Tarazdyń aýmaǵyn keńeıtýge keshe Úkimet kelisim berdi», dep jazady «Aıqyn» gazeti. Jambyl oblysynyń ákimi Qanat Bozymbaevtyń usynýynsha, Tarazdyń aýmaǵyn onyń mańyndaǵy Baızaq jáne Jambyl aýdandarynyń jerin qalaǵa qosý arqyly keńeıtý qajet. Sonda oblys ortalyǵynyń shekarasy 5 myń 953 gektarǵa ulǵaımaq, bul baǵyttaǵy daıyndyq jumystary qazirgi ýaqytta tolyǵymen aıaqtalǵan. Al sol jerlerdi ıelik etip otyrǵan fermerlerden jerdi satyp alý úshin 162 mıllıon teńge de qarastyrylǵan. Basylymnyń sársenbilik sanynda jarııalanǵan maqala «Úkimet Tarazdyń shekarasyn keńeıtti» degen taqyryppen berilgen.

«Taılandta tutqyndalǵan ushaq shymkenttiki me?». Osy taqyryppen «Aıqyn» gazetinde jarııalanǵan maqalada Associated Press agenttiginde jaryq kórgen habarǵa nazar aýdarylǵan. Onda «Zańsyz qarý-jaraq tasymaldady» dgen aıyppen Bangkokta ekıpajymen tutqyndalǵan IL-76 ushaǵy Shymkent áýekompanııasyna tıesili», delingen. «Biraq bul ázirge resmı organdardyń naqty málimeti emes. Óıtkeni osy máseleni zerttegen Associated Press aqparat agenttigi eshqandaı resmı organdarǵa silteme jasamaı, jeke óziniń ǵana zertteý qorytyndysyn jarııalap otyr», dep jazady basylym.

«Aıqyn» gazetinde elimizdiń birneshe ǵalymdarynyń «Ǵylym men bilimge súıengen Qazaqstan musylmandary dinı basqarmasynyń qyzmeti jaıly oı-tolǵam» atty kólemdi maqalasy jarııalandy. Maqalada aıtylǵan jaıttardyń egjeı-tegjeıin basylymnyń búgingi nómirinen oqyp bile alasyzdar.

***

Keshe Parlament májilisinde «Jer qoınaýyn paıdalaný týraly» zań jobasy talqylandy. Osyǵan oraı «Alash aınasy» gazetinde «Jerdi aıamaǵandardy aıamaıtyn zań kerek» degen taqyryppen maqala jarııalandy. Energetıka jáne mıneraldyq resýrstar mınıstrliginiń daıyndaǵan zań jobasyna Májilis tarapynan 1700-deı usynys túsip, sonyń 650-i engizilgen. Basylymnyń jazýynsha, jańa zań jobasynyń bir artyqshylyǵy alǵash ret osy salada jobalyq qujattardyń mańyzdy róli ornyqty aıqyndalǵan. Bul qujat budan bylaı jer qoınaýyn paıdalanýǵa arnalǵan kelisimsharttyń erejelerin ázirleýdegi negizgi qujat retinde qaralatyn bolady.

«Bas-aıaǵy 23 mınýtqa sozylǵan Úkimettiń keshegi otyrysynda májilis zalyna qaýly qoltyqtaı kirgen ekeýdiń asyǵy alshysynan tústi. Aldymen Úkimet múshelerine Ekonomıka jáne bıýdjettik josparlaý mınıstri Baqyt Sultanov ekonomıkalyq saıasattyń 2010 jylǵa arnalǵan negizgi baǵyttary týraly qaýlynyń jobasyn usyndy. Іle-shala mınıstrdiń ókshesin basa minberge kóterilgen Jambyl oblysynyń ákimi qanat Bozymbaev ortaǵa Taraz qalasy jáne Baızaq, Jambyl aýdandarynyń ákimshilik shekaralaryn ózgertý týraly qaýlynyń jobasyn tastady», dep jazady «Alash aınasy» gazeti. Basylymdaǵy aıtylǵan jaıttarmen «Teńge baǵamy turaqty bolmaq» degen taqyryptaǵy maqaladan tolyq maǵlumat alasyzdar.

Maldy tek arnaıy oryndarda soıý jónindegi zańǵa engizilgen ózgerister qarapaıym halyq arasynda biraz narazylyq týdyrǵan bolatyn. Sonymen qatar taıaýda ótken Úkimet otyrysynda respýblıka boıynsha osyndaı arnaıy oryndardyń qurylysy durys jolǵa qoıylmaǵandyǵy da aıtylǵan bolatyn. Osyǵan oraı «Alash aınasy» gazetiniń maldy tek arnaıy oryndarda soıý jónindegi zańǵa engizilgen ózgeristi ýaqytsha toqtatý qajet pe degen saýalyn aýyl sharýashylyǵy ǵylymynyń doktory, akademık Raqymjan Eleshevpen Aýyl sharýashylyǵy mınıstrliginiń baspasóz hatshysy Talǵat Mahanovqa qoıǵan. Olardyń bergen jaýaptaryn basylymnyń búgingi sanynan oqı alasyzdar.

***

«Izvestııa-Kazahstan» gazetiniń jazýynsha, Parıj bıligi jańa sý tasqynyna daıyndyq júrgizýde. Osydan 100 jyl buryn, 1910 jyly qańtardyń 26-ynda Parıjdi sý basyp qalǵan bolatyn. Birneshe saǵattyń ishinde Sena ózeniniń sýy 8,6 metrge kóterilgen. 10-nan astam adam qaza tapqan. Qazirgi ýaqytta barlyq sarapshylar jańa qaýip-qaterdiń barlyǵyn aıtýda. Qala óz qazynasyn qutqarýǵa daıyndalyp jatyr. Óte qupııa jaǵdaıda Lývr, Orse murajaılarynyń qyzmetkerleri baǵa jetpes mádenı qundylyqtarynyń biraz bóligin Parıj mańyndaǵy qalalardyń birindegi qoımaǵa ornalastyrǵan. Qarapaıym esepteýlerdiń ózinde sý tasqynynyń shyǵyny 15 mıllıard eýroǵa jetýi múmkin.