Taılandta tutqynda bolǵan qazaqstandyq ushqyshtar bosatyldy, olar senbige qaraǵan túni Almatyǵa keledi - QR SІM
qpannyń 12-si. QazAqparat /Ernur Aqanbaı/ - Taılandta eki aıdan astam ýaqyt tutqynda bolǵan qazaqstandyq ushqyshtar bosatyldy. Olar jumadan senbige qaraǵan túni Almatyǵa keledi. Bul týraly búgin Astanada ótken brıfıngte QR Syrtqy ister mınıstrliginiń resmı ókili Asqar Ábdirahmanov málim etti,
dep habarlaıdy QazAqparat.
«Qazaqstan Respýblıkasynyń Syrtqy ister mınıstrliginiń Bangkoktaǵy dıplomatııalyq mıssııasynyń aqparatyna sáıkes, astana ýaqyty boıynsha saǵat 17.15-te Qazaqstannyń tórt jáne Belarýstyń bir ushqyshy Bangkoktan Almatyǵa «Eır Astana» áýe kompanııasy ushaǵynyń reısimen jolǵa shyqty. Atalmysh azamattar Almatyǵa senbige qaraǵan túni jetedi degen aqparatty rastaımyz», - dedi brıfıngte A.Ábdirahmanov.
Onyń aıtýynsha, atalmysh máseleniń oń sheshimin tabýyna QR Syrtqy ister mınıstrligi, atap aıtqanda Bangkoktaǵy dıplomatııalyq mıssııanyń qosqan úlesi zor boldy. «QR Syrtqy ister mınıstrligi eki el arasyndaǵy qarym-qatynasty joǵary baǵalap, bizdiń azamattarymyzǵa qaıyrymdylyq kórsetip, olardyń elge oralýyna ruqsat bergeni úshin Taılandtaǵy áriptesterine shynaıy alǵysyn bildiredi», - dedi ol.
Onyń aıtýynsha, osy oraıda QR Syrtqy ister mınıstri men Taılandtyń Syrtqy ister mınıstri arasynda áńgime bolyp, bunda Qazaqstan tarapy osy istiń oń sheshilgeni úshin Taılandqa rızashylyǵyn bildirgen.
A.Ábdirahmanovtyń sózine qaraǵanda, ushaqtan tárkilengen qarý-jaraq Taıland aýmaǵynda qalady. «Ol qarý-jaraqtyń Soltústik Koreıadan shyqqany anyqtaldy jáne Birikken Ulttar Uıymynyń qararyna sáıkes ondaı qarý-jaraq joıylýy tıis», - dedi ol.
Onyń aıtýynsha, sonymen qatar, ushaq ázirshe Taıland aýmaǵynda qalatyn bolady. Onyń keleshek taǵdyryn Taıland bıligi anyqtaıdy.
