Taılandta qamaýda bolǵan ushqyshtarǵa qatysty tekserý jumystarynyń nátıjesi qoǵam nazaryna usynylady - N.Súıindikov
ASTANA. Aqpannyń 18-i. QazAqparat /Aıdar Ospanalıev/ - Taılandta qamaýda bolǵan ushqyshtarǵa arnaıy qyzmet ókilderi tekserý júrgizdi.
Bul týraly búgin Bas prokýratýranyń resmı ókili Nurdáýlet Súıindikov jýrnalıstermen bolǵan aptalyq brıfıngte aıtty, dep habarlaıdy QazAqparat.
Resmı ókildiń sózine qaraǵanda, bul shara Taıland elimen bolǵan dıplomatııalyq kelissózderge baılanysty bolyp otyr. Oǵan sáıkes, tutqynnan bosatylǵan azamattar elimizge kelgen soń quzyrly organ ókilderi tarapynan tekserilýleri qajet bolatyn. «Osyǵan baılanysty, tekserý sharalaryn Ulttyq qaýipsizdik komıtetiniń Almaty qalalyq departamentiniń ókilderi júrgizdi. Qazirgi tańda ushqyshtardyń árqaısysy ózderiniń otbasynda. Belarýs azamaty óziniń otanyna oraldy. Ulttyq qaýipsizdik komıtetiniń ókilderi júrgizgen tekserýler áli tolyq qorytyndylanǵan joq. Bul istiń nátıjesi shyqqan soń ol mindetti túrde qoǵam nazaryna usynylady», dedi resmı ókil.
