Taılandta ınsýlt alǵan áıel sanavıatsııamen Astanaǵa jetkizildi

ASTANA. QazAqparat- 27 sáýir kúni sanıtarlyq avıatsııa borty Taılandta ınsýlt alǵan Temirtaý qalasynyń turǵynyn Astanaǵa jetkizdi, dep habarlaıdy QazAqparat QR Densaýlyq saqtaý mınıstrliginiń baspasóz qyzmetine silteme jasap.

«Naýqas áıel arnaıy medıtsınalyq quraldarmen jabdyqtalǵan sanıtarlyq avıatsııa jáne bilikti dárigerler brıgadasynyń kómegimen jetkizildi. Qazir ol jiti baqylaýda», - dep jazylǵan habarlamada.

Vedomstvonyń habarlaýynsha, jyl basynan beri shetelden Qazaqstanǵa jaǵdaıy nasharlaǵan 6 adam jetkizilgen. Tasymaldaý jumystary respýblıkalyq bıýdjet esebinen júzege asyrylǵan.

Esterińizge sala keteıik, Taılandqa demalýǵa attanǵan 56 jastaǵy temirtaýlyq áıel 4 sáýir kúni ınsýlt alyp, Pattaıa qalasynyń aýrýhanasyna túsken bolatyn.

Sondaı-aq bıylǵy 6 qańtarda Taılandta otbasylyq demalysta júrgen Qazaqstan azamatshasy merziminen buryn bosanyp qalǵany týraly jazǵan edik. Áıel sábıimen birge sanavıatsııamen elge jetkizildi.