Taılandta ǵalymdar bezgekti taratpaý úshin masalardyń kóbeıý qabiletin joımaq
ASTANA. QazAqparat - Taılandta denge bezgeginiń tarala bastaýyna alańdaǵan ǵalymdar adam úshin qaýipti vırýsty tasymaldaýshymen kúresýdiń jańa ádisterin synap kórdi. Osy baǵyttaǵy sońǵy ıdeıalardyń biri radıatsııalyq gamma-sáýlelendirý kómegimen masalardyń kóbeıý qabiletin joıý-zararsyzdandyrýdy qolǵa alynýda, dep habarlaıdy reseılik TASS agenttigi.
Ulttyq ıadrolyq tehnologııalar ınstıtýtynda birneshe aıdan beri jasyl bezgekti masalarǵa synaq júrgizilýde. Qan sorǵysh jándiktiń osy túri denge bezgegi men Zıka vırýsyn adamǵa juqtyrady. Tájirıbe barysynda ǵalymdar masa analyǵyn radıatsııanyń shaǵyn dozasymen sáýlelendirý kezinde zararsyzdandyrýǵa, ıaǵnı urpaq órbitý qabiletinen aıyrýǵa bolatynyn anyqtady. Jándiktińń juptasý qabileti joıylmaıdy, tek sáýlege shaldyqqan masa men juptasqannan keıin analyqtyń jumyrtqasy dernásilge aınalmaıdy.
Synaqty aıaqtaýǵa 3-4 aı qajet. Endigi synaq masanyń tirshilik etý ortasynda jasalý josparlanyp otyr. Mamandar zararsyzdandyrylǵan analyq masalar jabaıy tabıǵat jaǵdaıynda kádimgi qan sorǵyshtarmen básekelese ala ma, joq pa, ázirge ony bilmeıdi. Eger tehnologııa tıimdi bolsa, ǵalymdar bezgek kóp taralǵan aýmaqqa sáýlelendirilgen masalar jiberýdi kózdep otyr.
