Taılandta balalar qutqarylǵan úńgirge kirýge tyıym salyndy
BANGKOK. QazAqparat - Ótken aptada ǵana Taılandtaǵy Tham Lýang úńgirinde teńdessiz izdestirý-qutqarý operatsııasy júrgizilip, nátıjesinde 12 fýtbolshy jasóspirim men olardyń bapkeri qutqarylǵan bolatyn. Atalǵan úńgirge endi seısenbiden bastap kirýge tyıym salyndy, dep dep habarlady Taılandtyń úshinshi ulttyq arnasy.
Rıa Novostı agenttiginiń habarlaýynsha, 18 kúnge sozylǵan qutqarý operatsııasy nátıjesinde úńgirge sý sorǵytý úshin kılometrge jetetin plastık qubyrlar men órt sóndirý quraldary jetkizilgen. Úńgirdiń alǵashqy úlken úsh kamerasyna arnaıy qurylǵylar ornatyldy, onyń ishinde elektrli nasostar da bar. Sol jerde operatsııanyń ýaqytsha komandalyq pýnkti ornalasty.
Oǵan qosa, úńgir aýmaǵynda jerasty sýyn sorǵytý men sýdyń úńgirdiń ishine kirýine jol bermeý maqsatynda júzdegen artezıan uńǵymalary qazyldy. Aldaǵy aptalarda jerasty dálizderinen barlyq qurylǵylar alynyp tastaıdy. Al artezıan uńǵymalarynyń kópshiligi jabylady, dep habarlaıdy telearna Chıangaraı provıntsııasynyń ákimshiligine silteme jasaı otyryp.
Qalpyna keltirý jumystarynan soń úgirge kirýge tyıym salynady. Úńgirde qalypty tabıǵı úderister bastalmaıynsha, shekteý alynbaıdy, delingen habarlamada.
Dúısenbi kúni úńgirdyń aýzynda mektep oqýshylary men olardyń bapkerleriniń aman qalǵany úshin árýaqtarǵa rızashylyq bildirildi. Sonymen qatar jınalǵandar operatsııa barysynda mert bolǵan sarbaz Saman Kýnandy eske aldy.
Osy shara barysynda Chıangaraı provıntsııasy ákimshiliginiń Taıland úkimetine Tham Lýang úńgirine jalpymemlekettik deńgeıdegi ulttyq park mártebesin berý týraly ótinish joldaǵany jarııa etildi.
Qazirgi tańda úńgir men onyń aınalasy provıntsııalyq mártebesi bar Doı Nang Non qoryǵynyń aýmaǵynda. Qoryqtyń mártebesin kóterý bolashaqta Tham Lýang úńgirin qalyń kópshilik úshin qoljetimdi týrıstik nysanǵa aınaldyrýǵa múmkindik týdyrady. Al ázirge úńgirge tek arnaıy daıyndalǵan týrıster ǵana kirip júr.
Úńgir týrıster úshin kún jyly kezde ǵana ashyq bolady. Onda bolashaqta qutqarý operatsııasy mýzeıi men úńgirlerden qutqarýshy daıverlerdi daıyndaıtyn halyqaralyq polıgon ornalasatyn bolady.
