Taıland premer-mınıstri Kambodja basshysymen telefonmen tildeskennen keıin qyzmetinen bosatyldy
ASTANA. KAZINFORM — Taıland Konstıtýtsııalyq soty premer-mınıstr Petongthan Chınavatty etıkalyq normalardy buzdy dep tanyp, 29 tamyz 2025 jyly qyzmetinen bosatty. Bul sheshim eldegi eń jas premer-mınıstrdiń ókilettigin aıaqtap, Taı saıasatynda 20 jyldan astam ýaqyt boıy ústemdik etken Chınavattar áýletine aýyr soqqy boldy. Bul týraly Euronews jazdy.
Sot 6-ǵa qarsy 3 daýys nátıjesinde Petongthannyń 15 maýsymda Kambodjanyń burynǵy basshysy Hýn Senmen júrgizgen telefon áńgimesi ulttyq múddege qaıshy boldy degen qorytyndyǵa keldi. Bul áńgime kóp uzamaı Kambodja men Taıland arasynda bolǵan shekara qaqtyǵysyna deıin jarııalanyp, qoǵamda narazylyq týdyrdy.
Áńgime mazmuny men syn
Aýdıojazbada Petongthan shekaradaǵy shıeleniske qatysty sóılesip, Hýn Sendi «aǵa» dep ataǵany, al bir taı armııa generalyn «qarsylas» dep sıpattaǵany estiledi. Bul onyń ulttyq qaýipsizdikke nuqsan keltirdi degen aıyptaýlarǵa sebep boldy.
39 jastaǵy Petongthan ózin qorǵap, bul sóıleý máneri — kelissóz taktıkasy bolǵanyn jáne shıelenisti tómendetýdi kózdegenin aıtty. Ol keshirim surap, ulttyq qaýipsizdikke zııan keltirmegenin málimdedi.
Sot sheshimi
Sot onyń nıeti Taılandtyń ulttyq múddesin qorǵaýǵa baǵyttalǵanyn, al áreketteri aýyr daǵdarystyń aldyn alýǵa tyrysqanyn moıyndady. Alaıda, sýdıalardyń kópshiligi onyń áreketi etıkalyq normalarǵa qaıshy dep tanydy.
Petongthan Chınavat sot sheshimin qabyldaıtynyn, biraq óz aıypsyzdyǵyn jáne adamdardyń ómirin saqtap qalýdy kózdegenin aıtty.
Telefon áńgimesiniń jarııalanýy
Telefon áńgimesiniń aýdıojazbasyn Kambodja eks-premeri Hýn Sen ózi jelige jarııalaǵan. Bul oqıǵa Taıland pen Kambodja arasynda shekaralyq shıelenistiń órshýi aıasynda bolǵan. Mamyrda Taılandpen shekaradaǵy daý aımaqta Kambodja sarbazy qaza tapqannan keıin, maýsym aıynda eki el arasynda bes kúndik qarýly qaqtyǵys bolyp, ondaǵan adam qaza taýyp, 260 myńnan astam turǵyn úılerin tastap ketken.
Chınavat áýletine soqqy
Petongthan — kásipker ári 2001–2006 jyldary premer bolǵan Taksın Chınavattyń qyzy. Taksın óz kezinde ulttyq múddeden góri jeke paıdasyn alǵa qoıǵany úshin synǵa ushyraǵan. Sondaı-aq, onyń Hýn Senmen jyly qarym-qatynasta bolǵany belgili.
Sot sheshimi Taksın Chınavat úshin de soqqy boldy. Ol 2006 jyly áskerı tóńkerispen bılikten ketse de, Taıland saıasatynda yqpaldy tulǵa bolyp qala berdi.
Eske sala keteıik, buǵan deıin Taıland keıbir provıntsııalardaǵy Kambodjamen shekarany japty.