Taıland pen Kambodja qaqtyǵysy: Qazaqstandyq týrısterge qaýip bar ma

ASTANA. KAZINFORM – Taıland pen Kambodja shekarasyndaǵy qarýly qaqtyǵystar kýrorttyq aımaqtardan alys jerde bolyp jatyr. Bul týraly QR Syrtqy ister mınıstrliginiń resmı ókili Aıbek Smadııarov pikir bildirdi. 

Mınıstrlik ókiliniń aıtýynsha, kún saıyn Taılandqa shamamen 3000 Qazaqstan azamaty ushady. Sonymen birge, qazaqstandyqtardyń kópshiligi elge týrıst retinde keletindikten, konsýldyq esepte 150-ge jetpeıtin adam ǵana tirkelgen.

– Bul qaqtyǵystar kýrorttyq aımaqtardan óte alysta bolyp jatyr, sondyqtan azamattarymyzǵa alańdaýdyń qajeti joq. Degenmen, bizdiń elshilik jaǵdaıdy jumys tártibi boıynsha baqylap otyr. Qazir bári tynysh. Kýrorttyq aımaqtar qaqtyǵys ornynan birneshe júz, tipti myńdaǵan shaqyrym qashyqtyqta ornalasqan. Biraq, árıne, bireý basyn qaterge tigip djýnglıge kirip ketpese..., – deıdi A.Smadııarov.

Osyǵan baılanysty Qazaqstannyń Syrtqy ister mınıstrligi Taılandtaǵy azamattarǵa qandaı da bir arnaıy usynym berýden bas tartty.

Aıta keteıik, Taıland Koroldik armııasynyń qolbasshylary Kambodjamen shekarada qaqtyǵystardyń kúsheıgenin habarlady.

Kambodja bıligi Taılandpen qaqtyǵysqa baılanysty shekaralas provıntsııalardaǵy barlyǵy 377 mektepti japty.