Taıland koroliniń balasy 27 jyldan keıin elge oralyp, jurtty tańǵaldyrdy
BANGKOK. QazAqparat – Taıland koroliniń ekinshi uly Maha Vachıralongkorna kútpegen jerden elge keldi. Ol 30 jylǵa jýyq ýaqyt ishinde koroldikke birinshi ret kelip tur, dep habarlaıdy QazAqparat CNN-ge silteme jasap.
Qurama Shtattarda turyp, jumys isteıtin 42 jastaǵy Vacharaesorn seısenbi kúni Bangkoktaǵy az qamtylǵan otbasylardan shyqqan balalarǵa arnalǵan balabaqshany kórip qaıtqan. Balalardy kútýge arnalǵan qorda jýrnalısterge suhbat bergen Vacharaesorn «Taılandqa oralǵanyma qýanyshtymyn, meni jyly qarsy aldy. Men kóp ýaqyt, ıaǵnı 27 jyl elde bolmadym», - dep málimdedi.
Vacharaesorn 71 jastaǵy korol Vachıralongkorn men onyń ekinshi áıeli ıÝvadhıda Polprasettiń tórt ulynyń ekinshisi. Ol áıelimen 1994 jyly otaý quryp, keıin ajyrasyp ketken. Ajyrasqannan keıin Vacharaesorn anasy jáne baýyrlarymen birge emıgranttar retinde koroldik dárejesinen aıyrylǵan bolatyn.
Korol saraıy Vacharaesornnyń Taılandqa kelgeni týraly resmı aqparat nemese kópshilikke málimdeme jasaǵan joq. Vacharaesornnyń Otanyna kelýi korol otbasyndaǵy qıyn kezeńderge tap kelgeni qyzyq. Koroldiń úlken balasy, 44 jastaǵy hanshaıym – Badjrakıtııabha jeltoqsanda júrek aýrýyna baılanysty es-tússiz kúıde aýrýhanaǵa jatqyzyldy. CNN Taıland koroliniń naqty murageri joq ekenin jazdy.
1952 jyly dúnıege kelgen Vachıralongkorn 2016 jyly eldi 70 jyl basqarǵan ákesi, korol Phýmıpon Adýlıadeta qaıtys bolǵannan keıin taqqa otyrdy. Korol tórt ret úılengen jáne onyń jeti balasy – eki qyzy men bes uly bar. Olardyń tek bireýi ǵana resmı hanzada bolyp moıyndalǵan. Sol sebepti ekinshi ulynyń Taılandqa kelgenine kópshilik tańǵaldy.
