Taıland keıbir provıntsııalardaǵy Kambodjamen shekarany japty

ASTANA. KAZINFORM – Taıland áskeri Kabodjamen shekaradaǵy ótkizý beketterin japty. Endi ol jerden saparlaýshylar óte almaıdy. Bul eki el arasyndaǵy burynnan kele jatqa terrıtorııalyq daýdyń sheıelenisýimen baılanysty bolyp otyr. Bul týraly The Guardian habarlady.

Taıland armııasy men áskerı-teńiz kúshteriniń málimdemesine sáıkes, Kambodjamen shekarany kesip ótýge barlyq kólik túrlerine jáne adamdarǵa – taılyqtarǵa da, sheteldikterge de – jeti provıntsııa aýmaǵynda tyıym salyndy.

Kambodja men Taıland arasyndaǵy shıelenis mamyr aıynda kúrt kúsheıdi. Shekaradaǵy daýly aýmaqta bolǵan qysqa atys kezinde kambodjalyq sarbaz qaza tapqan. Bul oqıǵaǵa baılanysty eki tarap ta jaýap berdi.

Saıası daǵdarysqa tap bolǵan Taıland premer-mınıstri Phethongtan Chınnavat dúısenbi kúni shekaralyq baqylaý kúsheıtiletinin, tek erekshe jaǵdaılarda ǵana, mysaly, emdelýge muqtaj naýqastarǵa nemese oqýǵa baratyn stýdentterge ǵana shekaradan ótýge ruqsat beriletinin málimdedi.

Shekaranyń jabylýy – eki eldiń bir-birine qarsy qoldanǵan sharalarynyń jalǵasy. Keıngi ýaqytta Kambodja taı fılmderin teledıdar men kınoteatrlarda kórsetýdi toqtatyp, Taılandtan jemis-jıdek, kókónis, gaz jáne janarmaı ımportyn alýdy toqtatty. Al Taıland shekaralyq baqylaýdy kúsheıtip, eki el de bir-biriniń azamattary úshin vıza merzimin qysqartty.

Shekteýler engizilgen provıntsııalar: Ýbonratchathanı, Sýrın, Býrıram, Sısaket, Sa Keo, Chanthabýrı jáne Trat.

Buǵan deıin premer-mınıstr Phethongtan Chınnavat sheteldikter úshin vızasyz bolý merzimin 60 kúnnen 30 kúnge deıin qysqartýdy tapsyrǵany habarlanǵan edi.

Osyǵan deıin Taıland parlamenti birjynysty neke týraly zań qabyldaǵany týraly jazdyq.