Taıland elge kiretinderden vaktsınatsııa pasportyn qaıta talap ete bastady

ASTANA. QazAqparat – 2023 jyldyń 9 qańtarynan Taılandqa barǵan jolaýshylardyń bári (18 jastan asqan) koronavırýsqa qarsy keminde eki doza vaktsına alǵanyn rastaıtyn sertıfıkatty (pasportty) kórsetýi qajet, dep habarlaıdy QazAqparat tilshisi «Air Astana» áýe kompanııasynyń baspasóz qyzmetine silteme jasap.

Vaktsınanyń ekinshi komponenti elge kirýden keminde 14 kún buryn alynýy kerek. Al, jolaýshylardyń 5%-y PTR-test tapsyrady.

«Vaktsınatsııasy joq jolaýshylar dárigerden keminde keıingi jarty jylda (180 kún) koronavırýstan jazylǵanyn rastaıtyn hat nemese anyqtama alýy tıis. DDU men Taılandtyń Qoǵamdyq densaýlyq saqtaý mınıstrligi maquldaǵan vaktsınalar tizimin siltemege ótip, kórýge bolady.

Taılandta koronavırýs juqtyryp alyp, óz eliniń talaptary qaıtýǵa ruqsat bermeıtin jolaýshylarda koronavırýstan emdelý shyǵyndaryn qarastyratyn medıtsınalyq saqtandyrýy bolýy kerek. Jumys boıynsha saıahattaýshylar, onyń ishinde ekıpaj músheleri bul talapty oryndaý úshin qabyldaýshy jaqtan hat usyna alady», - delingen áýe kompanııa habarlamasynda.

Vaktsınatsııa men saqtandyrý talabynyń taı pasporty barlarǵa, sondaı-aq tranzıtpen saıahattaýshy jolaýshylarǵa qatysy joq. Olar baratyn eliniń talabyn saqtaýy kerek.