Taıqazannyń oralýymen bizdiń elimizdiń yrysy, dáýleti qaıta keldi - akademık Ómirzaq Aıtbaıuly
ALMATY. 23 jeltoqsan. QazAqparat /Erlik Erjanuly/ - Ózbekáli Jánibekovtiń eń uly isteriniń biri Taıqazandy Túrkistanǵa qaıtarýy boldy, dedi QR UǴA akademıgi, fılologııa ǵylymynyń doktory, Halyqaralyq qazaq tili qoǵamynyń prezıdenti Ómirzaq Aıtbaıuly búgin Almatyda "Ózbekáli Jánibekov" dep atalatyn bıblıografııalyq kórsetkish pen "Ózbekáli Jánibekov taǵylymy" degen jańa kitaptyń tusaýkeser rásminde.
"Qazaq yrymshyl halyq. Taıqazannyń oralýy arqyly bizdiń elimizdiń yrysy, dáýleti qaıta keldi. Sonymen birge qazaqtyń búkil qasıeti qaıtyp kelgen sııaqty. Men Ózbekáli Jánibekovtyń eń uly isteriniń biri osy dep esepteımin", - dedi Ómirzaq Aıtbaıuly. Akademıktiń paıymdaýynsha, Ó. Jánibekov sondaı-aq elimizge, jerimizge qyzmet jasaǵan qandaı adamdar bolǵan dep bárin oı eleginen ótkizip, umyt bolyp bara jatqandardyń barlyǵyn qaıtadan eldiń esine salyp, olardyń ómir-tarıhyn jurtqa tanystyrdy. Túrli teatrlardy, ansamblderdi ómirge ákelip qazaqtyń ishki jan-dúnıesin baıytatyn, túrlendiretin, árlendirip-nárlendiretin kóp ister tyndyrdy. Sonyń nátıjesinde 1986 jyldan bastap qazaqtyń zııaly qaýymy qaıtadan silkenip, oıana bastady.
