Taıyz jáne jyra: Aqtóbede jaǵajaılardyń kóbi shomylý maýsymyna daıyn emes

Aqtóbe oblystyq TJD shomylý maýsymyna daıyndyq jaıyn pysyqtady. Bıyl barlyǵy 73 jaǵajaıdy uıymdastyrýǵa ótinish berilgen. Ereje boıynsha bul aýmaqtyń bárin aldymen súńgýirler tekserip shyǵýy tıis. Nátıjesinde tek 13-i talapqa saı bolyp shyqty. Onyń 8-i kommýnaldyq menshiktegi jaǵajaı.

- Oblysta 23 jaǵajaıǵa ruqsat berilmedi. Munda qutqarý quraldary jetkiliksiz. Tótenshe jaǵdaılar qyzmeti 30-mamyrǵa deıin taǵy tekserip, qaýipsizdikti qamtamasyz etse kelisim beredi. Sonymen birge ótinish bildirgen 29 jaǵajaıda jaǵdaı múlde ózgeshe. Munda sýǵa túsýge bolmaıdy. Óıtkeni sý taıyz, tabany balshyq, keıbirinde birden jyra, tereńdigi 3 metrden asady,- dedi Aqtóbe oblystyq TJD Azamattyq qorǵanys basqarmasynyń bastyǵy Isa Baıtursynov.

Aqtóbede eki kún boıy 72 jasaqshy-qutqarýshy oqytylady. Keıin olar jaǵajaılardaǵy qaýipsizdikti qamtamasyz etedi.

- Oblys aýmaǵynda ózen boıyndaǵy tyıym salý belgilerin túgendeý jumysy júrgizildi. Shomylýǵa qaýipti 228 sýǵa orynda 307 belgi ornatylǵan. Keıde adamdar dál osy belgilerdi syndyryp, búldirip ketedi. Bul durys emes. Belgi adam ómirin saqtap qalýǵa septigin tıgizedi. Sonymen birge Aqtóbe qalasy aýmaǵyndaǵy ózen boıynda 11 kamera qosýly tur. Qosymsha 35 orynǵa kamera ornatý jumysy qolǵa alyndy,- dedi Isa Baıtursynov.

Aqtóbede bıyl mektep janyndaǵy 401 lager balalardy tústen keıin qabyldaıdy. Tótenshe jaǵdaılar qyzmetiniń habarlaýynsha, byltyr osy arqyly balalardyń sýǵa ketý deregi 33% azaıdy. Shomylý maýsymynda kún saıyn 370-ke jýyq adam reıd júrgizedi. Olardyń arasynda tótenshe jaǵdaılar qyzmeti, polıtsııa, áskerıler men eriktiler, jergilikti atqarýshy organ ókilderi bar. Árqaısysy óz barar jerin biledi. Sonymen birge dybysty eskertý beretin tórt dron qoldanylady.

Eske salsaq, Shymkentte shomylýǵa tyıym salynǵan 13 ýchaske anyqtaldy. Aldaǵy ýaqytta olardyń sany 31-ge deıin kóbeıtilmek.