Taıfýnǵa baılanysty Vetnamda 100 myń adam qaýipsiz jerge kóshirilmek
ASTANA. 9 qarasha. QazAqparat - Vetnam bıligi «Haııan» taıfýnynyń jaqyndaýyna baılanysty jaǵalaýdaǵy aýdandarda turatyn 100 myńnan astam adamdy qaýipsiz jerlerge kóshirý sharalaryn bastady.
Osy joıqyn taıfýn budan buryn Fılıppınge zardap keltirgen bolatyn. Meteorologtardyń boljamyna qaraǵanda, taıfýn eldiń jaǵalaýdaǵy eldi mekenderine jeksenbide jetedi. Vetnam memlekettik BAQ-tarynyń habarlaýynsha, jaǵalaýdaǵy aýdandarda mektepter túgeldeı jabyldy. Budan buryn málim etilgendeı, «Haııan» taıfýny juma kúni Fılıppındi jaıpap ótti. Tabıǵı apat 100-den astam adamnyń ómirin qıdy. Qazirgi kezde taıfýn sál báseńdep, soltústik-batysqa qaraı saǵatyna 35 shaqyrym jyldamdyqpen jyljyp barady. Meteorologtardyń málimetinshe, senbide taıfýn Ońtústik Qytaı teńizi aıdynynda kúsheıe otyryp, Vetnamǵa qaraı jyljýyn jalǵastyrady.
