Taıfýn Tokıoda 26 myńnan astam úıdi jaryqsyz qaldyrdy
ASTANA. KAZINFORM - «Chan-Hom» taıfýny Úlken Tokıo aýmaǵyndaǵy 26,3 myńnan astam úıdi elektr qýatynsyz qaldyrdy. Tabıǵı apat Japonııanyń soltústik-shyǵysyndaǵy áýe jáne qurlyq kóligi qatynasyna da kedergi keltirdi, dep habarlaıdy reseılik TASS.
Ulttyq qoǵamdyq telearnanyń málimetinshe, tabıǵı apat saldarynan úsh adam zardap shekti.
Taıfýn ótken eldi mekenderden ǵımarattardyń zaqymdanǵany týraly aqparat túsip jatyr.
Qatty jel úılerdiń shatyrlaryn julyp áketip, kóptegen aǵashty qulatqan.
Jel ekpininiń jyldamdyǵy sekýndyna 35 metrge deıin jetedi.
Tabıǵı apat Japonııanyń negizgi Honsıý aralynyń soltústik-shyǵysyndaǵy kólik qatynasyna da áser etti.
Tokıodaǵy Haneda jáne Narıta áýejaılarynda, Sendaı áýejaıynda jáne birneshe óńirlik áýejaıda 100-den astam ishki jáne halyqaralyq reıs toqtatyldy.
Birqatar jolaýshylar poıyzynyń qozǵalysy da ýaqytsha toqtady.
Qalaaralyq avtobýs baǵyttarynyń edáýir bóligi de toqtatyldy.
Tokıo mańynda jolaýshylar tasymaldaıtyn paromdardyń qozǵalysy tolyq toqtatyldy.
Laos tilinde tropıkalyq aǵashtardyń biriniń ataýyn bildiretin «Chan-Hom» taıfýny Honsıý aralyn kesip ótip, Japon teńizi aımaǵyna shyǵady dep boljanyp otyr.
12 tamyz túske deıin Japonııanyń soltústik-shyǵysynda daýyldy jelmen birge 180 mıllımetrge deıin jaýyn-shashyn túsýi múmkin.
Bul kórsetkish ádettegi aılyq jaýyn-shashyn mólsherinen joǵary.
Osyǵan baılanysty bılik sý tasqyny men kóshkin qaýpi bar ekenin eskertti.
Kazinform úshin arnaıy TASS seriktes agenttigi usyndy.
Buǵan deıin daýyl Óskemende 25 myń turǵyndy jaryqsyz qaldyrǵany habarlanǵan bolatyn.
