Taıbeıde oryn alǵan ushaq apaty týraly jańa málimetter belgili boldy - VIDEO
ASTANA. QazAqparat - Taıbeıde Taıvan týrbınaly-vıntti ushaq apatynan kem degende 19 adam kóz jumdy. Jergilikti televıdenıe habarlaǵandaı, zardap shekkenderdiń sany 15, dep jazady TASS.
Qutqarýshylar qurbandar sanynyń artýy múmkin ekenin joqqa shyǵarmaıdy, sebebi 24 adam habar-osharsyz.
Kelip túsken derekterge sáıkes apat ornynda borttyq ózdiginen jazatyn apparat tabyldy. Ol sársenbi keshke oqylatyn bolady.
TransAsia Airways avıakompanııasynyń eki motorly óńirlik ATR-72-600 laıneri Taıvan buǵazynda Tszınmen ahrıpelagyndaǵy araldyń ákimshilik ortalyǵynyń «Sýnshan» áýejaıynan ishki reıske ushqan. Bortta úsh ekıpaj múshesi, 53 jolaýshy (eki bala jáne materıktik Qytaıdyń Sıamen qalasynan 31 týrıst) bar.
Ushqan sátten kóp keshikpeı, basqarýdy joǵaltqan ushaq qanatymen estakadaǵa soǵylyp, ózenge batyp ketti. Onyń artqy bóligi bólinip qaldy, al fıýzelıajdyń bólshek-bólshegi shyqty, onyń bóligi jaǵalaýdan ondaǵan shaqyrym jerde júzip júr.
Dıspetcherlerdiń aıtýynsha, pılot ushqannan keıin úsh ret belgi bergen. Sonymen birge azamattyq avıatsııa basqarmasynda apat sebepteri ázirge anyq emestigin atap ótken.
Ushaqqa bir jyl da bolmaǵan. Qaýipsizdik talaptaryna sáıkestigine sońǵy tehnıkalyq tekseristen 26 qańtarda ótken.
Ótken jylǵy shildede Taıvanda osy kompanııaǵa tıesili taǵy bir ushaq apatqa ushyraǵan. Penhý aralynda aýa raıynyń qolaısyz jaǵdaıynda qaıta qonbaqshy bolǵan kezde turǵyn úıdiń ústine qulaǵan. Ol kezde 49 adam qaza tapqan bolatyn.
