Taıaýda Túrkimenstan shekarasynda ustalǵan Qazaqstan azamattaryna qatysty sot úkimi shyǵady
Bul jaıynda Astanada ótken dástúrli aptalyq brıfıngte QR Syrtqy ister mınıstrliginiń resmı ókili Altaı Ábıbýllaev málim etti.
«Bizdiń azamattarymyzdyń ýaqytsha ustaý abaqtysyndaǵy jalpy jaǵdaıymen tanysý maqsatynda qazaqstandyq Elshilik ókiliniń bizdiń azamattarmen kezdesýi ótkizildi. Qazirgi kezde dıplomatııalyq arnalar boıynsha bizdiń otandastarymyzdy bosatý múmkindigi jóninde belsendi jumys atqarylýda»,-dedi resmı ókil.
Onyń sózinshe, jaqyn arada túrkimen tarapynyń sot sheshimi shyǵady dep kútilýde.
«Qazaqstan azamattaryn bosatý máselesi bizdiń elderimiz arasynda ornaǵan tatý kórshiles qarym-qatynas rýhynda ońynan sheshiledi dep úmittenemiz»,-dedi A. Ábıbýllaev.
Osyǵan deıin habarlanǵandaı, 19 qazanda Túrkimenstan Shekara qyzmeti Qazaqstannyń 7 azamatyn atalǵan eldiń shekarasyn zańsyz ótkeni úshin ustaǵan bolatyn.
