Taıaýda tehnıkalyq tekserý talonynan, «saqtandyrý» men salyqty tóleý týraly túbirtekti talap etýden bas tartamyz - QR Kólik jáne kommýnıkatsııa mınıstri
ASTANA. 12 maýsym. QazAqparat - Men tehnıkalyq tekserý týraly jazba qaldyrǵan ýaqyttan beri shamamen bir aı ótti. Osy ýaqyt aralyǵynda biz kóptegen jumystar atqardyq, ári sizderge aıtar taǵy da jańalyǵymyz bar, dep jazady QR Kólik jáne kommýnıkatsııa mınıstri Asqar Jumaǵalıev.
«Jaǵymdy jańalyqtan bastaıyn. Onyń biri - tehnıkalyq tekserýden ótý barysynda «saqtandyrýdy» usyný qajettigin alyp tastaý. Bul qujatty tehnıkalyq tekserý ortalyqtary avtomobıl ıelenýshilerden talap etpeýi úshin biz birqatar zańnamalyq aktilerge ózgerister engizdik. Sonymen qatar tehnıkalyq tekserýden ótý barysynda salyqtyń tólengeni týraly túbirtekti berý talabyn alyp tastaýdy josparlaýdamyz.
Budan bólek zańnamaǵa bul ózgeristerdi engizý tizbege tehnıkalyq tekserý ortalyqtaryn qosý úshin qujattardy qaraý merzimin qysqartýǵa múmkindik beredi. Egerde bul protsedýra 15 kúndi alsa, endigi ýaqytta tek 5 kún ketedi. Buǵan qosa tehnıkalyq tekserý ortalyqtaryn ashý úshin qajetti qujattar tizbesin qasqarttyq. Osy sharalardyń arqasynda halyqty atalǵan qyzmettermen qamtý ulǵaıtyldy, búginde elimizde tehnıkalyq tekserýdiń 391 jelisi bar. Aýyldyq jerlerde tehnıkalyq qyzmet kórsetý ortalyqtaryn arttyrý úshin biz zańnamaǵa taǵy bir ózgeris engizdik. Endigi ýaqytta aýylda ortalyq ashý úshin tehnıkalyq tekserýdiń bir jelisin alsa jetkilikti.
Taıaý aralyqta biz talonnan bas tartýdy josparlaýdamyz. Zańnamaǵa birqatar ózgerister engizilip, aqparattyq júıe iske qosylǵannan keıin tehnıkalyq tekserýden ótkendigin qaǵaz júzinde dáleldeý alynyp tastalady. Jol polıtsııasy qyzmetkerleri bul málimetterdi elektrondyq bazadan onlaın-rejimde alyp otyratyn bolady. Aıta keterligi, avtomobıl ıeleriniń jalǵan talon satyp alǵandyǵyn anyqtaýǵa bolady.
Ókinishke oraı, birqatar tehnıkalyq tekserý ortalyqtary bizdiń ádil jumys isteýge shaqyrýymyzdy eler emes. Sondyqtan da biz sózden iske kóshýge májbúrmiz. Mashınany tekserýden ótkizbeı talon bergen 2 tehnıkalyq tekserý ortalyǵyna aıyppul saldyq. Egerde bul iske qaıtadan bastary shatylatyn bollsa, onda tizbeden alyp tastaımyz. Eskerte keteıin, Aqtóbede bir tehnıkalyq tekserý ortalyǵy qazirdiń ózinde tizbeden alynyp tastaldy», - dep jazdy mıınstri.
