Taıaýda tabıǵı sıpattaǵy tótenshe jaǵdaılardyń aldyn alýǵa arnalǵan vedomstvo qurylady
ASTANA. KAZINFORM – Jaqynda Tótenshe jaǵdaılar mınıstrliginiń qurylymynda tabıǵı jáne tehnogendik apattardyń aldyn alý máselelerimen aınalysatyn arnaıy vedomstvo qurylýy múmkin.
«Memleket basshysynyń TJM ókilettikterin berýge qatysty tapsyrmasyna sáıkes, ortalyq jáne jergilikti atqarýshy organdarǵa qatysty baqylaýdy júzege asyrý bóliginde tabıǵı ári tehnogendik apattardyń aldyn alý máseleleri boıynsha baqylaý fýnktsııalary bar jeke vedomstvo qurylady. Qazir «QR Tótenshe jaǵdaılar mınıstrliginiń Tótenshe jaǵdaılardyń aldyn alý komıteti» respýblıkalyq memlekettik mekemesin qurýdy kózdeıtin «Qazaqstan Respýblıkasy Tótenshe jaǵdaılar mınıstrliginiń keıbir máseleleri týraly» Úkimet qaýlysynyń jobasy ázirlendi», - delingen TJM baspasóz qyzmetiniń Kazinform agenttigine bergen málimetinde.
Bul turǵyda, «Quqyqtyq aktiler týraly» Zańnyń 18-babyna sáıkes, osy qaýly jobasy jarııa talqylaý úshin ashyq normatıvtik quqyqtyq aktilerdiń ınternet-portalyna ornalastyryldy.
«Qaýly jobasy bıyldyń 24 mamyryna deıin talqylanady. Jobany iske asyrý - qurylǵan vedomstvoǵa ortalyq jáne jergilikti atqarýshy organdarǵa qatysty tabıǵı jáne tehnogendik sıpattaǵy tótenshe jaǵdaılardyń aldyn alý máselelerinde baqylaýdy júzege asyrýǵa múmkindik beredi», - dep atalyp ótken mınıstrlik aqparatynda.
Aıta keteıik, QR Prezıdenti Ákimshiliginiń Basshysy Aıbek Dádebaev Jibek Joly telearnasyna suhbat berip, onyń barysynda Tótenshe jaǵdaılar mınıstrliginiń qurylymynda tabıǵı jáne tehnogendik apattardyń aldyn alý máselelerimen aınalysatyn arnaıy vedomstvo qurylǵany óte mańyzdy ekenin aıtqan edi.
