Taıaýda elordada qoqys óńdeıtin zaýyt iske qosylady
ASTANA. 18 qyrkúıek. QazAqparat - 10 qazan kúni elordada qoqys óńdeıtin zaýyttyń saltanatty ashylý rásimi ótedi.
Bul týraly búgin Qazaqstannyń turaqty damýyn qamtamasyz etý jáne «jasyl ekonomıka» prıntsıpterin engizý máselelerine arnalǵan semınar barysynda QR Qorshaǵan ortany qorǵaý mınıstri Nurlan Qapparov málim etti.
Qoqys óńdeý «jasyl ekonomıkaǵa» kóshýdiń mańyzdy sektorlarynyń biri ekendigin basa aıtqan ol: «Aǵymdaǵy jyldyń 10 qazanynda Astanada qoqys óńdeıtin zaýyt saltanatty túrde ashylady. Zaýyt ıspan tehnologııasymen salynǵan ári jylyna 400 myń tonna qoqys óńdeıtin bolady», - dedi.
Onyń atap ótýinshe, zaýyt elorda qajettiligin tolyǵymen óteýge qaýqarly. Sonymen qatar mınıstrlik taıaý eki jyldyń ishinde dál osyndaı 9 zaýyt salýdy josparlaýda.
«Qazirdiń ózińde taıaý 10-15 jyldyń ishinde 41 zaýyt salý baǵdarlamasy ázirlendi», - dedi N.Qapparov.
