Taıaýda eldegi jataqhanalarǵa qatysty protsesti tsıfrlandyrý tolyq aıaqtalady — Úkimet
ASTANA. KAZINFORM — Premer-mınıstr Oljas Bektenov stýdenttik jataqhanalardan oryn berý protsesin tsıfrlandyrýdy jetildirýge qatysty túsinik berdi.
— Memleket basshysynyń tapsyrmasyn iske asyrý maqsatynda Ǵylym jáne joǵary bilim mınıstrligi (ǴJBM) Jasandy ıntellekt jáne tsıfrlyq damý mınıstrligimen, basqa da múddeli memlekettik organdarmen birlesip memlekettik kórsetiletin qyzmetterdiń, onyń ishinde stýdenttik jataqhanalar berý jónindegi qoldanystaǵy protsesterdi tsıfrlandyrýdyń reınjınırıngin júrgizip jatyr. Jataqhanalardy tsıfrlandyrýdyń biryńǵaı standarttaryn ázirleý jáne oqý oryndaryn jataqhanalar platformasyna kezeń-kezeńimen qosý týraly ǴJBM jumysyna toqtalsaq, 2026 jyldyń sońyna deıin jataqhanalardy basqarý protsesterin tsıfrlandyrýǵa qoıylatyn biryńǵaı arhıtektýralyq, tehnologııalyq, fýnktsıonaldyq, sondaı-aq ózge de talaptar qalyptastyrylady. Bul óz kezeginde barlyq joǵary jáne joǵary oqý ornynan keıingi bilim berý uıymdarynda (JJOKBU) qoldanylady, — dep atalyp ótken Oljas Bektenovtiń Quryltaı depýtatynyń saýalyna bergen jaýabynda.
Onyń sózine qaraǵanda, qazir birqatar JJOKBU jataqhanadan oryn bergende jáne ózge de servısterdi (bólmelerdi tańdaý, stýdentterdi esepke alý, sharttar jasasý jáne t. b.) usynǵanda tsıfrlyq sheshimderdi paıdalanyp otyr.
Atap aıtqanda, 2026–2027 oqý jylynyń sońyna deıin JJOKBU deńgeıinde jataqhanalardy jáne barlyq ishki protsesti tsıfrlandyrýdy tolyq aıaqtaý josparlanǵan. Al 2027–2028 oqý jylynan bastap Joǵary bilim berýdiń biryńǵaı platformasy bazasynda jataqhanalarǵa bólý ári qonystandyrý boıynsha derekterdi esepke alýdy jáne shoǵyrlandyrýdy, sondaı-aq ótinishterdi «elektrondyq úkimet» portaly arqyly ortalyqtandyrylǵan túrde qabyldaı otyryp, kezeń-kezeńimen qamtamasyz etý josparlanǵan.
— Bul rette ınfraqurylymdy damytýǵa jáne stýdenttik turǵyn úıge qajettilikti monıtorıngteýge baılanysty is-sharalardy iske asyrý kezinde jergilikti atqarýshy organdarmen ózara is-qımyl máselesi eskeriletin bolady, — dedi Úkimet basshysy.
Buǵan deıin habarlanǵandaı, keıingi jeti jylda Qazaqstanda 66 104 orynǵa arnalǵan 267 stýdenttik jataqhana ashyldy. Nátıjesinde stýdentter jataqhanalaryndaǵy oryn tapshylyǵy 82 myńnan 5,2 myńǵa deıin azaıdy.
