Taıaýda daǵdarys bolýy múmkin be - Úkimet jaýaby
ASTANA. KAZINFORM — Qazaqstanda qarjylyq daǵdarys bolýy múmkin be? Bul suraqqa Premer-mınıstrdiń orynbasary — Ulttyq ekonomıka mınıstri Serik Jumanǵarın jaýap berdi.
— Qazaqstan halqyna eshqandaı daǵdarysqa daıyndalýdyń qajeti joq, óıtkeni biz jetkilikti ári senimdi syrtqy býfer quryp jatyrmyz. Sondyqtan keler jyly Ulttyq qordan nysanaly transfertterdi tartpaıtyn boldyq. Ulttyq qordyń ózi bizdiń ishki jáne syrtqy kez kelgen jaǵdaıǵa qarsy senimdi býfer sanalady. Onyń kapıtalyn ósirý kerek, ıaǵnı qazir Ulttyq qordyń jınaqtaý fýnktsııasyn kúsheıtip jatyrmyz, - dedi S. Jumanǵarın Májilistiń jalpy otyrysynan keıin tilshiler suraǵyna jaýap bere otyryp.
Budan buryn habarlanǵandaı, búgin Májiliste «Respýblıkalyq jáne oblystyq bıýdjetter, respýblıkalyq mańyzy bar qalalar, astana bıýdjetteri arasyndaǵy 2026 — 2028 jyldarǵa arnalǵan jalpy sıpattaǵy transfertterdiń kólemi týraly» Zańy qabyldandy.
Sonymen qatar, palata depýtattary 2026-2028 jyldarǵa arnalǵan respýblıkalyq bıýdjet jobasyn qabyldady.