Taıaýda agrarlyq saladaǵy kásiporyndarǵa jeńildetilgen jańa nesıe baǵdarlamasy iske qosylady
ASTANA. KAZINFORM – Aýyl sharýashylyǵy vıtse-mınıstri Erbol Tasjúrekov agrarlyq salany qarjylandyrý tetikteri týraly aıtyp berdi.
«Úkimettiń qoldaýymen egin egý jáne egin oraǵy jumystaryna jylyna 5% mólsherlememen 580 mlrd teńge bólinedi. Onyń ishinde 100 mlrd teńgesi jeńildetilgen lızıngke baǵyttalǵan. 2025 jyly 5% mólsherlememen kóktemgi egis jáne egin oraǵy naýqanyn jeńildetilgen qarjylandyrý jalǵasady. Nesıeni uzartýdyń saldarynan kepildikterdiń bolmaý máselesin sheshý maqsatynda «Damý» qory arqyly nesıelerdi kepildendirý mehanızmi engizildi. Ol nesıe somasynyń 85 paıyzyn kepildendirýge múmkindik beredi», - dedi E.Tasjúrekov Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, aýyl sharýashylyǵy tehnıkasyn jańartý deńgeıin 8-10 paıyzǵa maqsatynda «QazAgroQarjy» AQ-ǵa tehnıkany jylyna 5% mólsherlememen lızıngke berý úshin qosymsha 100 mlrd teńge tartý eskerilgen. Bul soma keler jyldary 450 mlrd teńgege deıin jetkiziledi. Sonymen qatar fermerlerdiń jeńildetilgen mólsherlememen lızıngke tehnıka alý múmkindiginen basqa, keıinnen ınvestıtsııalyq sýbsıdııalaý tetigi aıasynda 30% ótemaqyǵa qol jetkizý alý múmkindigin alady.
«Bıyl Úkimet 2028 jylǵa deıin aýyl sharýashylyǵy ónimderin qaıta óńdeýdi damytýdyń keshendi josparyn qabyldady. Jakynda aýyl sharýashylyǵy ónimderin óńdeýmen aınalysatyn kásiporyndar qatysa alatyn jeńildetilgen jańa nesıe baǵdarlamasy iske qosylady. Olar 5% mólsherlememen nesıeni otandyq shıkizat satyp alý úshin paıdalana alady. Qazirgi kezde osy maqsattarǵa 30 mlrd teńge bólý máselesi qarastyrylyp jatyr», - dedi vıtse-mınıstr.
2024 jyly 79 ınvestıtsııalyq jobany júzege asyrýǵa da 100 mlrd teńge bólingen. Al 2025 jyly 122 ınvestıtsııalyq jobany jeńildetilgen tártipte qarjylandyrýǵa 200 mlrd teńge qarastyrylady.
Munymen qosa E.Tasjúrekov «Aýyl amanaty» baǵdarlamasyn júzege asyrý baǵytyna toqtaldy. 2023 jyly 17 myń mıkronesıeni berý úshin 100 mlrd teńge bólindi. 2024 jyly baǵdarlamany júzege asyrýda 80 mlrd teńge ıgeriledi.
