Taıaý jyldarda elordada sý tapshylyǵy bolýy múmkin

NUR-SULTAN. QazAqparat – Keler jyly astanada sorǵy-súzý stantsııasy iske qosylady. Bul týraly elorda kásipkerlerimen kezdesken Nur-Sultan qalasynyń ákimi Altaı Kólginov málim etti, dep habarlaıdy QazAqparat tilshisi.

Qala basshysynyń sózinshe, jazda baý-baqshalardy sýarý saldarynan jeke sektorlar men keıbir kópqabatty úılerdegi sý qysymy tómendep ketedi. Sonymen qatar, Altaı Kólginov sý tapshylyǵy máselesi de ózekti ekenin jetkizdi.

«Eger biz jańa sorǵy-súzý stantsııasyn salmasaq, onda bolshaqta sý tapshylyǵy bolady. Sondyqtan qazirgi ýaqytta elordada úshinshi stantsııa salynyp jatyr. Búginde bizde eki sorǵy-súzý stantsııasy bar. Qurylysy júrip jatqan úshinshisi 2023 jyly iske qosylady. Ol birden tolyq qýatynda jumys istemeıdi. Alǵashqy kezeńde tek 30 myń tekshe metr sýdy sorýǵa, ony súzgiden ótkizýge qaýqarly bolady. Al jalpy tolyq qýaty – 105 myń tekshe metr. Jazda jeke sektorlarda sý qysymy nege tómendeıdi? Sebebi jer úıler baý-baqsha sýarýdy bastaıdy. Saldarynan keıbir kópqabatty úılerde sý qysymy tómendeıdi. Biz bul máseleni stantsııa iske qosylǵanda sheshemiz», - dep atap ótti Altaı Kólginov.

Onyń aıtýynsha, bolashaqta osyndaı taǵy bir stantsııa salý qajet. Budan basqa, qala ishindegi ınjenerlik jelilerdi tartý jumystary boıynsha týyndaǵan máselelerdi sheshý joldary qarastyrylyp jatqanyn jetkizdi.

Eske salaıyq, buǵan deıin Altaı Kólginov elordada baspana salý qarqynyn tómendetýdi usynǵanyn habarlap edik.