Taıaý úsh jyldyń ishinde 1,3 myń shaqyrym temirjol salynady - Smaıylov
«Qazaqstandy «tranzıttik hab» retinde qalyptastyrý jumysy basymdyq sanalady. Ásirese, qazirgi geosaıası jaǵdaıda bul taqyryp barynsha ózekti bola túsýde. Qazaqstannyń kólik júıesin halyqaralyq dálizdermen yqpaldastyrý óńirdegi negizgi kólik haby retindegi pozıtsııamyzdy saqtap qalýǵa múmkindik beredi. Transkaspıı halyqaralyq kólik baǵdary men «Soltústik-Ońtústik» dálizi negizgi baǵdar sanalady», - dedi Álıhan Smaıylov Indýstrııa jáne ınfraqurylymdyq damý mınıstrliginiń keńeıtilgen alqa otyrysynda.
Úkimet basshysy Aqtaý men Quryq teńiz porttaryn keshendi damytý jumystaryn jedeldetý qajettigin basa aıtty. Sonymen qatar «Aqtaý teńiz porty» AEA bazasynda kólik-logıstıkalyq hab qurý jumystaryn jandandyrý kerektigine nazar aýdartty.
«Qazaqstannyń tranzıttik-kólik áleýetin odan ary damytý úshin QTJ-ny ulttyq kólik-logıstıkalyq kompanııaǵa transformatsııalaý jumystaryn sapaly júrgizý qajet. Muny aıttyq. Bul máseleni erekshe baqylaýda ustaý kerek. Ótken jyldyń qarashasynda «Dostyq-Moıynty» temirjol ýchaskesiniń ekinshi jolynyń qurylysy bastaldy. 2026 jylǵa deıin «Almaty stansasynyń aınalma joly», «Darbaza-Maqtaaral», «Baqty-Aıagóz» jobalaryn aıaqtaý josparlanǵan. Taıaý úsh jyldyń ishinde 1,3 myń shaqyrym temirjol salynady. Osy negizgi ınfraqurylymdy temirjol jobalaryn júzege asyrýdy jedeldetý qajet», - dedi Álıhan Smaıylov.
