Taıaý úsh kúnde Qazaqstanda aýa temperatýrasynyń tómendeýi kútiledi
ASTANA. QazAqparat - Bıylǵy jyldyń sońǵy kúnderi normadan 8-13 gradýs, al respýblıkanyń shyǵysynda - 15-22 gradýs joǵary bolǵan aýa temperatýrasy ózgere bastaıdy.
Bul týraly 29-31 jeltoqsan kúnderine aýa raıy boljamynda «Qazgıdromet» RMK habarlaıdy.
Aldaǵy úsh kúnde Qazaqstannyń kóptegen oblystarynda tsıklondardyń ótýimen birge qar jaýyp, burqasyn bolady, 15-25 m/s jyldamdyqpen jel soǵady, 29 jeltoqsanda kóktaıǵaq kútiledi. Biraq batystan soqqan jel endi soltústik-shyǵysqa aýysyp, Taımyr aýdandarynan keletin salqyn aýa respýblıkanyń soltústik oblystaryna ótip, aýanyń temperatýrasy atalǵan kezeń úshin normaǵa eń jaqyn bolady.
Bul kúnderi respýblıkanyń ońtústik jartysyna Iran aýdandarynan jyly aýa ótýin jalǵastyryp, Jańa jyldyń aldynda temperatýra normadan 4-10 gradýs joǵary bolady.
