Taıaý Shyǵysty úlken soǵys elesi kezip júr - Nursultan Nazarbaev

ASTANA. QazAqparat - Taıaý Shyǵysty úlken soǵys elesi kezip júr. Bul týraly búgin elordada ótip jatqan  Astana klýbynyń jalpy otyrysynda QR Prezıdenti  Nursultan Nazarbaev aıtty, dep habarlaıdy QazAqparat tilshisi.

«Úlken Eýrazııanyń keıbir óńirlerinde keń aýqymdy áskerı teketirestiń oryn alýy qaýpi joǵary. Jarylys qaýpi barynsha joǵary óńirlerdiń biri Taıaý Shyǵys bolyp otyr. Qazirgi ýaqytta biz Sırııadaǵy daǵdarystan týyndaǵan turaqsyzdyqty, Iraktaǵy saıası shıelenistiń saqtalýyn, Lıvııadaǵy azamattyq soǵysty, Arab elderindegi ishki syn-tegeýirinderdiń damýyn baıqap otyrmyz», - dep atap ótti Elbasy.

QR Prezıdenti munyń barlyǵy óte kúrdeli jaǵdaıda jáne álemdik qoǵamdastyq uzaq ýaqyt boıy jumys isteýiniń nátıjesinde qol jetkizilgen Iranmen aradaǵy ıadrolyq kelisimniń ydyraýymen baılanysty tereńdeı túskendigin basa aıtty. Qazaqstannyń álem elderine úlgi kórsetip, ıadrolyq qarýdan óz erkimen bas tartqanyn eske saldy.

«Keler jyly sheshilmegen problemalardyń shýmaǵy Taıaý Shyǵysqa úlken soǵys elesin qaıta oraltyp, munan ary shyrmalana túsýi múmkin», - dedi Nursultan Nazarbaev. 

Aıta keteıik, Elbasy jıyn barysynda Úlken Eýrazııanyń sulbasy qalyptasyp kele jatqanyn aıtyp, Reseı, AQSh jáne Qytaı arasyndaǵy geosaıası básekelestikke alańdaýshylyq tanytty.

Sonymen qatar Nursultan Nazarbaev álemdik derjavalar qarýlaný jarysyna qaıta oralýy múmkin ekendigin eskertti.