Taıaý Shyǵysta sýsamyrǵa shaldyqqandardyń qarasy 60 mln adamǵa jetýi yqtımal
ASTANA QazAqparat - Sýsamyrmen aýyratyndar álem boıynsha Parsy shyǵanaǵy elderinde kóp tirkelgen. Bul jergilikti halyqtyń salaýatty ómir saltyna mán bermeýinen ári shekten tys toıa tamaqtanýynan týyndap otyr, dep jazady www.muslim.kz saıty.
«Surap alǵan aýrýdyń emi joq» dep atamyz qazaq beker aıtty deısiz be? Sýsamyr da emi joq aýrýlardyń biri ekenin jaqsy bilesizder. Parsy shyǵanaǵy elderiniń osynaý syrqat túriniń taralýy jaǵynan álemniń aldyńǵy ondyǵyna kirip otyrǵanyn málimdedi Parsy shyǵanaǵy elderi ýnıversıtetiniń medıtsına fakýltetiniń janyndaǵy otbasylyq medıtsına bóliminiń meńgerýshisi Feısal Ablý Látip an-Naser.
Onyń sózine qaraǵanda, Parsy shyǵanaǵy elderindegi sýsamyrmen syrqattanǵandardyń sany 15-20 paıyzdyń aralyǵynda. Aldaǵy ýaqytta bul kórsetkish óse túspese, kemimeıdi. Jýyrda Dýbaıda ótken otbasy dárigerleriniń halyqaralyq konferentsııasynda keltirilgen málimetke qaraǵanda 2030 jylǵa qaraı Taıaý Shyǵystaǵy sýsamyrmen aýyratyndardyń qarasy 60 mln adamǵa jetýi múmkin.
