Taıaý Shyǵys elderiniń AQSh-tyń Sırııaǵa áskerı soqqysyna kózqarasy qandaı
Aıta keterligi, búgin AQSh Prezıdenti Donald Tramp Vashıngtonnyń Sırııaǵa qarsy taıaýdaǵy áskerı is-qımylyna baılanysty Saýd Arabııasynyń koroli Salman ben Abdel Azız al Saýdqa qońyraý shaldy. Telefonmen suhbattasý barysynda T.Tramp Saýd Arabııasy koroline 59 joǵary dáldikti basqarylatyn zymyran ushyrǵandyǵyn jáne olar Sırııadaǵy Shaırat aerodromyna dál tıgendigin aıtty. Batys sarapshylarynyń paıymynsha, atalǵan áskerı nysannan 4 sáýir kúni Sırııanyń úkimettik áskerı hımııalyq qarýdy paıdalanyp shabýyl jasaǵan.
Mysyr Prezıdenti A.Al Sısı aǵymdaǵy jyldyń naýryzynda D.Tramp ákimshiligi Aq úıge resmı saparmen kelýge shaqyrtý alǵan birinshi arab kóshbasshysy bolyp otyr.
Amerıkalyq áýe soqqysynan keıin Mysyr AQSh pen Reseıge «janjaldy toqtatyp», sırııalyq daǵdarysty túbegeıli sheshýge qol jetkizýge shaqyrdy.
AQSh-tyń áskerı áreketin Bahreın de qoldap otyr. Bul eldiń Syrtqy ister mınıstri «mundaı qadam zorlyq-zombylyqty jáne jappaı qyryp-joıý qarýyn taratýdy toqtatý úshin qajet» ekendigin málimdedi.
Iran basshylyǵy bolsa AQSh-tyń bul áreketine narazylyq bildirip, Sırııanyń áskerı nysanyna jasalǵan soqqyny «destrýktıvti ári qaýipti» dep baǵalady. «Biz barlyq birjaqty áskerı is-qımyldardy jáne AQSh áskerı kemelerinen jasalǵan zymyran soqqysyn aıyptaımyz», - dedi Iran SІM-niń resmı ókili Bagram Hassemı.
Jalpy, búginde sırııalyq teketireste resmı Damaskiniń eń jaqyn seriktesi Tehran men Máskeý bolyp otyrǵany belgili.
Al Izraıl Premer-Mınıstri Benıamın Netanıahý óz kezeginde resmı Tel-Avıvtiń AQSh áreketin tolyqtaı qoldaıtyndyǵyn, «mundaı sharalar tek Sırııanyń ǵana emes sonymen birge Iran jáne KHDR-diń basshylyǵna da áser etýi tıistigin» basa aıtqan.
Aıta keteıik , búgin Qazaqstan Syrtqy ister mınıstrligi Sırııadaǵy shıelenistiń órshı túsýine baılanysty óziniń alańdaýshylyǵyn bildirdi. Sonymen qatar qaqtyǵystyń odan ári órshýi jáne taraptar ustanymdarynyń qatańdanýy halyqaralyq qoǵamdastyqtyń terrorıstik qaýipke qarsy kúres boıynsha buryn qol jetkizgen barlyq, onyń ishinde Jeneva jáne Astana protsesteri sheńberindegi ýaǵdalastyqtaryna qaýip tóndiretindigin jáne Sırııa jerinde barlyǵyn qamtıtyn beıbitshilik pen kelisimge jetý perspektıvasyn alystatatyndyǵyn atap ótken edi.
