Taıaý Shyǵystaǵy jaǵdaıǵa baılanysty toqtaǵan reıster qaıta iske qosylady
ALMATY. KAZINFORM — Air Astana Taıaý Shyǵystaǵy jaǵdaıdyń turaqtanýyna baılanysty Qazaqstan men Birikken Arab Ámirlikteri arasyndaǵy turaqty áýe qatynasyn kezeń-kezeńimen qalpyna keltiredi.
Áýe kompanııasynyń málimetinshe, Almaty — Dýbaı — Almaty baǵytyndaǵy reıster 20 maýsymnan, al Astana — Dýbaı — Astana baǵyty 10 shildeden bastap qaıta iske qosylady. Iran áýe keńistiginiń jabylýyna baılanysty ushaqtar Pákistan aýmaǵy arqyly ushady.
Almaty baǵytyndaǵy reısterdiń sany birtindep artyp, 6 shildeden bastap kún saıyn oryndalady. Astanadan ushatyn reıster de kezeń-kezeńimen kóbeıtilip, 3 tamyzdan bastap kúndelikti qatynaıdy.
Sondaı-aq bıletterin 31 shildege deıin qaıta brondaǵan jolaýshylarǵa Almatydan ushý úshin 20 maýsymnan, al Astanadan ushý úshin 10 shildeden bastap tegin qaıta brondaý múmkindigi usynylady.
Air Astana kompanııasy Taıaý Shyǵystaǵy ahýaldy jiti baqylap otyrǵanyn habarlady. Qajet bolǵan jaǵdaıda ushý kestesine qosymsha ózgerister engizilip, jolaýshylarǵa aldyn ala aqparat beriledi.
Eske salaıyq, buǵan deıin 2027 jyldan bastap Gonkong pen Almatynyń arasynda tike áýe reısi qatynaıtynyn jazǵanbyz.
