Taıaý Shyǵystaǵy jaǵdaıǵa baılanysty 4 myńnan astam qazaqstandyqqa qoldaý kórsetildi
ASTANA. KAZINFORM – Taıaý Shyǵystaǵy jaǵdaıdyń shıelenisýine baılanysty shetelde qalyp qoıǵan 4 myńnan astam qazaqstandyqqa arnaıy Týrkod júıesi arqyly kómek kórsetildi.
28 aqpannan bastap birqatar áýe kompanııa reısterdi toqtatyp, ushý kestesine ózgerister engizdi. Sonyń saldarynan týrıstik kody (týrkod) bar keıbir uıymdastyrylǵan qazaqstandyq týrıster ýaqytynda elge orala almady. Nátıjesinde: Birikken Arab Ámirlikterinde – 2 450, Qatarda – 1 061, Saýd Arabııasynda 432 týrıst ýaqytsha qalyp qoıǵan. Olardyń barlyǵy Qazaqstanǵa qaıtqanǵa deıin qonaqúımen jáne tamaqpen qamtamasyz etildi. Sonymen qatar «Týrıstik Qamqor» qory júıesiniń ákimshisi týrısterdi tıisti áýejaılarǵa deıin jetkizý jumystaryn uıymdastyrdy.
Qordyń málimetinshe, qazirgi ýaqytta júıe ákimshisi jaǵdaıdy turaqty baqylaýda ustap otyr. Sondaı-aq týroperatorlar men áýe kompanııalarymen birlesip, Qazaqstan azamattarynyń elge oralýyn jedel uıymdastyrý jumystary júrgizilip jatyr.
Eske salaıyq, Qazaqstanda 2016 jyldan bastap Úkimet qaýlysymen shetelge shyǵatyn týrızm salasynda azamattardyń quqyqtaryn kepildendirýdiń biregeı júıesi engizilgen. Onyń ákimshisi – «Týrıstik Qamqor» korporatıvtik qory. Júıeniń negizgi maqsaty – týroperator bankrotqa ushyraǵan jaǵdaıda nemese tótenshe jaǵdaılar týyndaǵanda qazaqstandyq týrısterdiń shetelden kepildendirilgen túrde elge qaıtarylýyn qamtamasyz etý. Bul shyǵyndar júıege qatysýshy týroperatorlardyń qarajaty esebinen óteledi.
Qazirgi tańda kepildendirý júıesine 13 týroperator-frahtaýshy, turaqty reıstermen jumys isteıtin 45 týroperator, shamamen 1 myńǵa jýyq týragenttik seriktes qatysady.
Azamattardyń qolaılyǵy úshin táýlik boıy jumys isteıtin baılanys ortalyǵy jáne «Týrkod» mobıldi qosymshasy iske qosylǵan. Qosymsha arqyly álemniń kez kelgen núktesinen evakýatsııaǵa ótinish berýge, týragenttiktiń qyzmetine baǵa berýge jáne qaýipsiz týrdy tańdaýǵa bolady.
Memlekettik bıýdjetten qarajat shyǵyndalmaı, 17 myńnan astam qazaqstandyq týrıst júıe kómegimen elge qaıtaryldy.
Buǵan deıin Qazaqstannyń memlekettik organdary men dıplomatııalyq ókildikteriniń qoldaýymen Taıaý Shyǵys óńirinen Qazaqstanǵa 9 517 qazaqstandyq qaıtarylǵanyn jazǵanbyz.