Taıaý Shyǵystaǵy jaǵdaı: jarylystar men reısterdiń toqtatylýy týraly qazaqstandyqtardyń pikiri
ASTANA.KAZINFORM — Taıaý Shyǵys elderinde júrgen qazaqstandyqtar qazirgi jaǵdaı men kólik jáne áýe qatynasyndaǵy ózgerister týraly áleýmettik jelilerde jazyp jatyr.
Qazaqstandyq áleýmettik jeli qoldanýshysy Burj Al Arab («Parýs» qonaqúıi) mańynda jarylystardyń estilgenin jazdy.
— Shamamen 5 mınýt buryn jarylys boldy. Biz «Parýs» qonaqúıiniń janynda turamyz — óte qorqynyshty, — delingen habarlamada.
Jalpy qala boıynsha jarylystardyń dybysy estilgeni aıtylyp jatyr.
Keıbir paıdalanýshylar tarsyl men jarylys dybystaryn estigenin, al jekelegen aýdandarda, olardyń sózinshe, «jer silkinisindeı» diril sezilgenin, onyń ishinde jasandy araldarda da baıqalǵanyn jazyp jatyr. Basqalary ortalyq jáne jaǵalaý aýdandarynda jaǵdaıdyń tynysh ekenin, «olarǵa eshteńe jetpegenin» atap ótken.
Jańalyqtarda Dýbaıdan shyǵatyn joldarda jappaı keptelisterdiń vıdeolary tarap jatyr.
Raketalyq shabýyl týraly habarlamalardan keıin adamdardyń qaladan ketýge tyrysyp jatqany aıtylyp jatyr.
Buǵan deıin qazaqstandyqtar Dýbaıǵa deıin ushýǵa 1-2 saǵat qalǵan kezde ushaqtardyń keri qaıtarylǵanyn habarlaǵan. Keıin kýágerlerdiń aıtýynsha, óńirdegi áýe keńistigi is júzinde jabylyp, reıster toqtatyldy.
— Tańerteń reıster áli kelip jatqan, al qazir birde-bir ushaq joq. Soqqylar dál ushý kezinde bastaldy dep jazyp jatyr, — deıdi paıdalanýshylar.
— Bizdiń ushaqty Almatyǵa keri burdy, áýejaıda 6 naýryzǵa deıin reıster toqtatylǵanyn aıtty, — dep jazady jarııalanym avtory.
Áleýmettik jelilerde Dohada júrgen turǵyndar men týrısterden de habarlamalar paıda bolýda. Paıdalanýshylar jarylystardy estigenin jáne úıden shyqpaýǵa shaqyrǵan eskertýlerdi birneshe ret alǵanyn jazyp jatyr.
Eske sala keteıik, Izraıl Tegeranǵa «preventıvtik soqqy» jasady. Bul týraly Izraıldiń Qorǵanys mınıstri Israel Kats málimdedi.
Oǵan qosa, Donald Tramp AQSh-tyń Iranǵa qarsy «kóp masshtabty áskerı operatsııa» bastaǵanyn rastady.
Sonymen qatar Qazaqstan Taıaý Shyǵystaǵy alty eldiń áýe keńistigine tolyq tyıym saldy.
QR SІM Taıaý Shyǵystaǵy jaǵdaıǵa oraı jedel baılanys nómirlerin habarlady.
Irandaǵy Qazaqstan azamattarynyń arasynda zardap shekkender joq.
Prezıdent Irandaǵy jaǵdaıǵa baılanysty qaýipsizdik máseleleri boıynsha tapsyrma berdi.
