Taıaý Shyǵystaǵy jaǵdaı Túrkııanyń áýe keńistigine júktemeni kóbeıtti
ASTANA. KAZINFORM – Taıaý Shyǵystaǵy qaqtyǵystyń ýshyǵýynan keıin birneshe el áýe keńistigin paıdalanýǵa shekteýler engizdi, al Túrkııanyń tranzıttik áýe keńistigine júktemeni kóbeıtti, dep habarlaıdy Kazinform-nyń Ankaradaǵy menshikti tilshisi.
Túrkııanyń Ekonomi Manşet basylymynyń habarlaýynsha, álemdik áýe aǵynynyń bir bóligi Túrkııa arqyly qaıta baǵyttalyp, bul onyń áýe dálizderindegi keptelisti arttyrdy.
Túrkııanyń Kólik jáne ınfraqurylym mınıstrliginiń málimdeýinshe, Irandaǵy oqıǵalar men jalǵasyp jatqan soǵys qımyldaryna baılanysty Iran, Irak, Izraıl, Sırııa, Bahreın, Kýveıt jáne Qatardyń áýe keńistiginde ártúrli deńgeıdegi shekteýler engizilgen. Aýǵanstanda áýe qozǵalysyn basqarý qyzmetteri ýaqytsha toqtatyldy, al BAÁ áýe keńistiginde arnaıy retteý sharalary qoldanylyp otyr.
Vedomstvo málimetinshe, Izraıldegi Ben-Gýrıon áýejaıy shekteýli jumys istep tur, al Haıfa, Ramon, Rosh-Pına jáne Gertslııa áýejaılary jabyq. Sırııada Damask jáne Aleppo halyqaralyq áýejaılaryndaǵy jaǵdaı NOTAM áýe mıssııalary úshin qazirgi habarlamalarǵa baılanysty turaqsyz bolyp qalyp otyr.
Baǵyttyń jabylýyna baılanysty reısterdiń kóp bóligi Túrkııa arqyly qaıta josparlandy. Negizgi baǵyt – Saýd Arabııasy-Mysyr-Túrkııa-Ońtústik Kıpr, sondaı-aq Ázerbaıjannyń soltústik baǵyty arqyly Eýropa baǵyttary.Túrkııa bıligi túrik aspanyndaǵy áýe qatynasy júktemeniń artýyna qaramastan qaýipsiz jáne úzilissiz jumys istep jatqanyn habarlady.
28 aqpanda aımaqtyq shekteýlerge baılanysty 15 reıs basqa baǵytqa aýystyryldy, onyń toǵyzy Ystanbul áýejaıyna qondy.
Budan basqa, Túrkııa ulttyq áýe kompanııalarynyń eki ushaǵy Tegeran áýejaıynda qalyp otyr. Túrik tasymaldaýshylary baǵyttaryn qazirgi shekteýlerge sáıkes ózgertip jatyr, al tıisti qyzmetter jaǵdaıdy baqylaýdy jáne odan ári áreketterdi úılestirýdi jalǵastyryp keledi.
Osyǵan deıin Ankarada jańa VIP áýejaı ashylatynyn habarladyq. Ol 2026 jyldyń shildesinde ótetin NATO sammıtine oraı eldiń negizgi VIP jáne úkimettik áýejaıyna aınalady.
Eske sala ketsek, 2025 jyly Túrkııa áýejaılary rekordtyq 247,2 mln jolaýshyǵa qyzmet kórsetti. Bul respýblıka tarıhyndaǵy eń joǵary kórsetkish.
