Taıaý Shyǵystaǵy jaǵdaı: tańǵy ahýal
ASTANA. KAZINFORM — Izraıl men AQSh Iran aýmaǵyna soqqy jasaǵannan keıin, Tegeran Izraılge jáne birqatar kórshiles elderge zymyran shabýyldarymen jaýap berdi. Ótken túnde Taıaý Shyǵysta qandaı ózgerister bolǵany týraly tańerteńgi málimetterdi Kazinform agenttiginiń sholý materıalynan bile alasyz.
28 aqpan kúni keshke AQSh pen Izraıldiń Tegeranǵa jasaǵan soqqylarynan keıin Irannyń joǵarǵy kóshbasshysynyń jaǵdaıyna qatysty buqaralyq aqparat quraldarynda ózara qarama-qaıshy aqparattar tarady. Keı derekterde aıatolla Alı Hameneı rezıdentsııasynyń soqqylar saldarynan eleýli zaqymdanǵany týraly aıtyldy.
Tegeran tarapynan resmı málimdeme jasalǵan joq. Birqatar halyqaralyq BAQ Irannyń joǵarǵy kóshbasshysy qaza tapqany jóninde aqparat taratqan bolatyn.
Keıin bul týraly AQSh Prezıdenti Donald Tramp resmı túrde málimdedi.
Tańerteńge qaraı Irannyń memlekettik BAQ-y aıatolla Alı Hameneıdiń qaza tapqany týraly aqparatty rastady. Málimetke sáıkes, eldiń joǵarǵy kóshbasshysy senbi kúni tańerteń jasalǵan shabýyl saldarynan kóz jumǵan.
Iran úkimeti aıatollanyń qaıtys bolýyna baılanysty elde 40 kúndik jalpyulttyq aza tutý jarııalap, jeti kúndi memlekettik demalys kúni dep belgiledi.
Irandyq derekkózderdiń málimetinshe, soqqylar saldarynan el aýmaǵynda 200-den astam adam qaza tapqan. 700-den astamy jaraqat alǵan. Shabýyldar Irannyń 14 provıntsııasyn qamtydy.
Budan bólek, soqqylar Dýbaı halyqaralyq áýejaıy aýmaǵyna da tıgeni habarlandy.
Radıoaktıvtik jaǵdaıǵa qatysty, Halyqaralyq atom energııasy agenttiginiń málimetine sáıkes, Izraıl men AQSh-tyń Iranǵa jasaǵan áskerı operatsııasy qazirge deıin Taıaý Shyǵystaǵy radıatsııalyq fonǵa áser etpegen.
Iran aýmaǵynda júrgen Qazaqstan azamattary úshin QR Elshiligi shuǵyl baılanys tártibi men elden shyǵý múmkindikterin túsindirdi.
Qaqtyǵystyń shıelenisýin BUU Bas hatshysy Antonıý Gýterrısh jáne BUU organdarynyń basshylary qatań synǵa aldy. AQSh pen Izraıldiń Iranǵa jasaǵan aýqymdy avıatsııalyq soqqylaryna baılanysty BUU Qaýipsizdik Keńesi shuǵyl otyrys ótkizdi. Bas hatshy halyqaralyq beıbitshilik pen qaýipsizdikke salmaqty qaýip tónip turǵanyn eskertti.
Qazaqstan Prezıdenti Qasym-Jomart Toqaev Birikken Arab Ámirlikteriniń, Saýd Arabııasynyń, Qatar, Bahreın jáne Kýveıt memleketteriniń basshylaryna jeke hattar joldap, atalǵan elderdiń halqyna osy aýyr synaqtar kezeńinde shynaıy qoldaý men birligin bildirdi. Ol Qazaqstan úshin baýyrlastyq jáne dostyq qarym-qatynastaǵy memleketterdiń egemendigine nuqsan keltiretin barlyq áskerı áreketterdi qatań aıyptady.
Memleket basshysy Qazaqstan halyqaralyq daýlardy tek dıplomatııalyq jolmen sheshýdi ustanatynyn jáne baýyrlas arab memleketterine múmkindiginshe kómek kórsetýge daıyn ekenin málimdedi.