Taıaý Shyǵystaǵy jaǵdaı óńirdegi saýdaǵa teris áser etýi yqtımal — Shavkat Mırzıeev

TAShKENT. KAZINFORM — Ózbekstan Taıaý Shyǵystaǵy jaǵdaıdyń ýshyǵý qaýipine alańdaýly. Bul týraly el prezıdenti Shavkat Mırzıeev respýblıkada júrgizilip jatqan reformalardyń tıimdiligin talqylaýǵa arnalǵan keńeste málim etti, dep habarlaıdy Kazinform agenttiginiń menshikti tilshisi.

Shavkat Mırzıeev keıingi bes aıda eldiń ónerkásibi — 6,4%, eksport — 18%, al sheteldik ınvestıtsııa kólemi 46%-ǵa óskenin aıta kele, Taıaý Shyǵystaǵy ahýalǵa toqtaldy. Onyń sózinshe, qalyptasqan kúrdeli jaǵdaı Ortalyq Azııa óńirine de teris áser etýi múmkin.

— Taıaý Shyǵystaǵy shıelenis jalǵasqan saıyn, pandemııadan keıin endi qalpyna kele bastaǵan saýda baılanystaryn nyǵaıtý, kólik dálizderin paıdalaný men olardy damytý qıyndaı túspek. Sondyqtan árbir oblys basshysy, mınıstr óziniń salasy boıynsha múmkindik pen táýekeldi baǵamdap, áreket ete bilýi tıis. Tapsyrma kútip otyrmaı, bastama kóterý qajet, — dedi Shavkat Mırzıeev.

Eske salaıyq, 13 maýsymǵa qaraǵan túni Izraıldiń áskerı-áýe kúshteri Iranǵa soqqy jasady. Keıin resmı Tel-Avıv tótenshe jaǵdaı rejımin jarııalap, óziniń áýe keńistigin japty.

Soqqyǵa jaýap retinde Iran Izraılge 100-den astam dron jiberdi.