Taıaý Shyǵystaǵy jaǵdaı: Qysqy Paralımpıada-2026 ótpeı qalýy múmkin be
ASTANA. KAZINFORM – Halyqaralyq paralımpıada komıteti (HPK) Taıaý Shyǵystaǵy zymyrandyq soqqylarǵa baılanysty jaǵdaıdyń 2026 jylǵy qysqy Paralımpıada oıyndaryn ótkizýge yqpaly jóninde málimdeme jasady.
Resmı habarlamada komıtet Mılan men Kortınada ótetin qysqy Paralımpıada-2026 oıyndaryna jáne jalpy paralımpıadalyq qozǵalysqa áserin baǵalaý úshin qolda bar aqparatty jınap, naqtylap jáne saraptap jatqanyn málimdedi.
– Bul jaǵdaı oıyndarǵa qatysatyn ulttyq paralımpıada komıtetterine ǵana emes, barlyq múshelerimizge áser etetinin túsinemiz. Eń aldymen adamdarǵa keletin saldary týraly oılaımyz, zardap shekken jandarmen birgemiz, – delingen HPK málimdemesinde.
Soǵan qaramastan, Taıaý Shyǵystaǵy áskerı is-qımyldardyń kúsheıýine jáne halyqaralyq áýe reısteri kestesiniń ózgerýine qaramastan, komıtet Qysqy Paralımpıada-2026 oıyndaryn buryn bekitilgen jospar boıynsha ótkizýge nıetti.
– Biz jaǵdaıdyń oıyndardy uıymdastyrýǵa, ásirese saparlarǵa áserin baǵalap otyrmyz. Negizgi maqsatymyz – qysqy Paralımpıada oıyndaryn joǵary deńgeıde ótkizý jáne bul sharanyń álemdegi 1,3 mıllıard múgedektigi bar adam úshin áleýmettik ıntegratsııa alańy bolyp qala berýin qamtamasyz etý. Biz oıyndarǵa qatysatyn barlyq delegatsııamen jáne ózge de múddeli taraptarmen tyǵyz baılanystamyz. Kóptegen komandalar qazirdiń ózinde Eýropada jattyǵý jıyndaryn ótkizip jatyr. Degenmen Taıaý Shyǵystaǵy áýe keńistiginiń jabylýy keıbir qatysýshylardyń kelýine áser etýde. Qazirgi kezeńde jekelegen delegatsııalar nemese sportshylardyń mártebesine qatysty túsinikteme bermeımiz. Alaıda Mılan men Kortına-2026 uıymdastyrýshylarymen birlesip, áser etken taraptarǵa sheshim tabý úshin bar kúshimizdi salamyz, – delingen habarlamada.
Paralımpıada oıyndary – múmkindigi shekteýli sportshylar úshin tórt jyldyq kezeńniń basty básekesi. HPK ókilderi Mılan – Kortına-2026 oıyndary qaýipsiz, senimdi ári joǵary deńgeıde ótetinine sendirdi.
Aıta keteıik, elordalyq sportshylar para paýerlıftıngten el chempıonatynda birneshe medal jeńip aldy.