Taıaý Shyǵystaǵy jaǵdaı qandaı
ASTANA. KAZINFORM — Búgin tańerteń Izraıl men Amerıka Qurama Shtattary Iranǵa soqqy jasaı bastady. Tegeran jaýap retinde Izraıl aýmaǵyna jáne kórshiles arab elderine zymyranmen shabýyl jasady.
28 aqpan kúni tańerteń Izraıl «Arystannyń aıbaty» operatsııasy aıasynda Tegeranǵa «aldyn ala soqqy» jasady. Reuters agenttiginiń habarlaýynsha, soqqylardyń negizgi nysanasy joǵary laýazymdy ırandyq sheneýnikter bolýy múmkin.
Prezıdent Donald Tramp Amerıka Qurama Shtattary Iran aýmaǵynda eldiń zymyran arsenalyn joıý jáne amerıkalyq azamattardy qorǵaý maqsatynda «aýqymdy áskerı operatsııa» bastaǵanyn rastady.
Izraıl premer-mınıstri Bınıamın Netanıahý operatsııa Iran tarapynan tóngen «ekzıstentsııalyq qaýiptiń» aldyn alýǵa jáne ıadrolyq qarý jasaýǵa jol bermeýge baǵyttalǵanyn málimdedi.
Buǵan jaýap retinde Iran Izraılge qarsy «aýqymdy zymyran jáne ushqyshsyz apparattar shabýylynyń birinshi tolqyny» bastalǵanyn jarııalady. Tel-Avıvte jáne eldiń ortalyq bóligindegi basqa qalalarda áýe dabyly qaıta qosyldy. Izraıldiń ortalyǵyna baǵyttalǵan zymyrandardyń biri áýe qorǵanys quraldarymen atyp túsirildi.
Irannyń joǵary laýazymdy sheneýnigi «Ál-Jazıra» telearnasyna bergen pikirinde Taıaý Shyǵystaǵy barlyq amerıkalyq jáne ızraıldik nysan men múddeler «zańdy nysanaǵa» aınalǵanyn aıtty.
Kúni boıy Katarda, Kýveıtte, Birikken Arab Ámirlikterinde, Bahreınde jáne Saýd Arabııasynda jarylystar bolǵany habarlandy. Ábý-Dabıde keminde bir adam qaza tapty. Katar Qorǵanys mınıstrligi áýe qorǵanys júıesi arqyly ırandyq zymyrannyń atyp túsirilgenin málimdedi.
Irakta áskerı bazaǵa shabýyl jasaldy. Eki adamnyń qaza tapqany jáne úsh adamnyń jaralanǵany rastaldy.
Birqatar eldiń bıligi azamattardy jasyrynýǵa jáne áskerı nysandardan alys bolýǵa shaqyrdy.
Pentagon Iranǵa jasalǵan soqqylar «Epıkalyq qahar» operatsııasy dep atalǵanyn habarlady.
Reuters málimetinshe, Amerıka Qurama Shtattary Iranǵa qarsy birneshe kúnge sozylatyn shabýyldar josparlap otyr.
Izraıl armııasy Iranmen qaqtyǵys aıasynda kúshterdi aýqymdy túrde arttyrǵanyn jarııalap, qosymsha 20 myń rezervısti shaqyrdy.
Irannyń Irna agenttigi Iran prezıdenti Masýd Pezeshkıannyń zardap shekpegenin habarlady.
Qazaqstan Respýblıkasy Syrtqy ister mınıstrliginiń málimetinshe, Irandaǵy zardap shekkender arasynda qazaqstandyqtar joq. Qazirgi ýaqytta Iran aýmaǵynda Qazaqstan Respýblıkasynyń 96 azamaty bar. Qazaqstannyń sheteldik mekemeleriniń shuǵyl baılanys jáne jedel jeli nómirleri jarııalandy.
Prezıdent Qasym-Jomart Toqaev Qaýipsizdik Keńesiniń hatshysy Gızat Nurdáýletovke kúshtik vedomstvolar men tıisti mınıstrlikter basshylarymen birlesip, Iran tóńiregindegi jaǵdaıdyń ýshyǵýyn jáne elimizdegi turaqtylyqqa tónýi múmkin qaýip belgilerin eskere otyryp, shuǵyl sharalar qabyldaý josparyn usynýdy tapsyrdy.
Barlyq kúshtik vedomstvo táýlik boıy jumys rejımine kóshirildi. Úkimette Syrtqy ister mınıstrliginiń úılestirýimen arnaıy monıtorıngtik top jumysyn bastady. Óńir ákimderine Taıaý Shyǵystaǵy qalyptasqan jaǵdaıdy eskere otyryp, tıisti sharalardy qarastyrý tapsyryldy.