Taıaý Shyǵystaǵy jaǵdaı Azıada-2026 oıyndarynyń qaýipsizdigine áser etýi múmkin
ASTANA. KAZINFORM — Azııa Olımpıadalyq keńesiniń (AOK) prezıdenti sheıh Djoan bın Hamad Ál Tanı Taıaý Shyǵystaǵy qazirgi jaǵdaıǵa jáne onyń sportshylar men sporttyq jarystarǵa yqpalyna qatysty málimdeme jasady.
2026 jylǵy 19 qyrkúıek pen 4 qazan aralyǵynda Japonııada HH mereıtoılyq jazǵy Azııa oıyndary ótedi dep josparlanǵan. Alaıda osy iri qurlyqtyq sporttyq doda bastalardan jarty jyl buryn Taıaý Shyǵysta jańa áskerı qaqtyǵys órship, bul janjal qaqtyǵys aımaǵyndaǵy elderdiń sportshylarynyń ómiri men densaýlyǵyna qaýip tóndirip qana qoımaı, keshendi sport jarystaryn ótkizý qaýipsizdigine de qosymsha táýekelder týǵyzdy.
Jýyrda Aıtı–Nagoıa qalasynda 2026 jylǵy Azııa oıyndaryn úılestirý komıtetiniń kezekti otyrysy ótti. Onyń qorytyndysy boıynsha Azııa Olımpıadalyq keńesiniń prezıdenti sheıh Djoan bın Hamad Ál Tanı mańyzdy málimdeme jasady. Onyń aıtýynsha, qazirgi ýaqytta Azıada-2026 oıyndaryn keıinge qaldyrý nemese múlde ótkizbeý máselesi qarastyrylyp jatqan joq. Degenmen qatysýshylardyń qaýipsizdigine qater tóngen jaǵdaıda túrli balama nusqalar talqylanýy múmkin.
— Azııa Olımpıadalyq keńesi ulttyq olımpıadalyq komıtettermen jáne 2026 jylǵy aldaǵy oıyndardy uıymdastyrý komıtetterimen tyǵyz baılanysta jumys istep jatyr. Osyndaı belgisizdik kezeńinde biz tynyshtyqtyń saqtalýyna, qaýipsizdiktiń qamtamasyz etilýine jáne óńirde turaqtylyqtyń tez arada qalpyna kelýine úmittenemiz. Dıalog pen beıbit turǵyndardy qorǵaý basty basymdyq bolyp qalýy tıis. Bizdiń negizgi mindetimiz — azııalyq olımpıadalyq qozǵalystyń, ásirese sportshylarymyzdyń qaýipsizdigi men ál-aýqatyn qamtamasyz etý. Azııa Olımpıadalyq keńesi qazirgi jaǵdaıdy muqııat ári jaýapkershilikpen baqylap otyr. Keńes birlikke negizdelgen uıym, al dál qazir bul birlik burynǵydan da mańyzdy. Óńirde turaqtylyq jaqyn arada qalpyna keledi dep senemiz, — delingen Ál Tanıdiń málimdemesinde.
Sonymen qatar ol qalyptasqan jaǵdaıdan zardap shekken otbasylar men qaýymdastyqtarǵa qoldaý bildirip, Taıaý Shyǵystaǵy qazirgi qaqtyǵys azııalyq olımpıadalyq qozǵalysty qatty alańdatyp otyrǵanyn atap ótti. Onyń aıtýynsha, bul jaǵdaı sportshylar men jergilikti qaýymdastyqtarǵa teris áser etti.
28 aqpanda Izraıl Iranǵa soqqy jasady. Sol kúni AQSh prezıdenti Donald Tramp Iranǵa qarsy aýqymdy áskerı operatsııa bastalǵanyn jarııalady. Buǵan jaýap retinde Tegeran Taıaý Shyǵystaǵy amerıkalyq áskerı bazalarǵa jáne Izraıl aýmaǵyna shabýyl jasady. Óńirdegi qaqtyǵys áýe qatynasynyń aıtarlyqtaı buzylýyna ákeldi.
Al 2 naýryz kúni Halyqaralyq paralımpıada komıteti (IPC) Taıaý Shyǵystaǵy zymyran soqqylarynyń 2026 jyly Italııada ótetin qysqy Paralımpıada oıyndaryn ótkizý múmkindigine yqpaly týraly málimdeme jasaǵan bolatyn.
