Taıaý Shyǵystaǵy jaǵdaı aıasynda munaı baǵasy 100 dollardan joǵary saqtaldy
ASTANA. KAZINFORM — Munaı baǵasy juma kúngi tómendeýge qaramastan, barreline 100 dollardan joǵary deńgeıde qalyp otyr. Apta qorytyndysy boıynsha Brent jáne WTI markaly munaı baǵasy Taıaý Shyǵystaǵy qaqtyǵys saldarynan jetkizilimderdiń úzilý qaýpine baılanysty 8 paıyzdan astam ósýi múmkin, dep habarlaıdy Reuters.
Brent munaıynyń baǵasy 3,02 dollarǵa nemese 2,81 paıyzǵa tómendep, barreline 104,61 dollar boldy. WTI baǵasy 2,43 dollarǵa nemese 2,37 paıyzǵa arzandap, barreline 100,05 dollardy qurady. Saýda barysynda eki markanyń da baǵasy mamyr aıynyń ortasynan bergi eń joǵary deńgeıge jetti.
Baǵanyń tómendeýine Ormýz buǵazy arqyly teńiz qatynasyn ýaqytsha retteý jóninde kelissózder júrgizilýi múmkin degen aqparat sebep boldy. Alaıda naryq qatysýshylary energetıkalyq ınfraqurylymǵa jasalǵan shabýyldar men munaı jetkizilimderiniń odan ári úzilý qaýpine alańdap otyr.
Halyqaralyq energetıkalyq agenttiktiń málimetinshe, tamyzda Saýd Arabııasyndaǵy munaı óndirý kólemi táýligine 2,3 mln barrelge qysqaryp, 6 mln barrelge deıin tómendegen. Bul – sońǵy 30 jyldan astam ýaqyttaǵy eń tómen kórsetkish.
Saýd Arabııasynyń Ormýz buǵazyn aınalyp ótip, munaı eksporttaýǵa múmkindik beretin «Shyǵys–Batys» munaı qubyrynyń zaqymdanǵany týraly aqparat ta naryqtaǵy táýekelderdi kúsheıtti.
Munaı men munaı ónimderin jetkizýdegi irkilister aıasynda AQSh-ta dızel otynynyń ortasha baǵasy alǵash ret gallonyna 6 dollardan asty.
Sarapshylardyń baǵalaýynsha, aımaqtaǵy teńiz qatynasyna qoıylatyn shekteýler men Reseıdegi munaı óńdeý zaýyttarynyń jumysyndaǵy irkilister dızel otyny men basqa da munaı ónimderiniń baǵasyn munaı qunynyń ósý qarqynynan da joǵary deńgeıde ustap turýy múmkin.
Buǵan deıin Munaı baǵasy alǵash ret 24 shildeden beri barreline 101 dollardan asqany habarlanǵan bolatyn.
